رئیسي: امریکا په افغانستان کې یوازې ویجاړۍ او وژنې کړي 

د ایران ولسمشر ابراهیم رئیسي دغه هېواد ته د نویو ورغلو سفیرانو د اعتبارلیکونو اخیستلو پر مهال ویلي، د امریکا متحده ایالتو ۲۰ کاله په افغانستان کې حضور درلود، خو له ورانۍ، ویجاړۍ او د نشه يي توکو د قاچاق له ډېرېدو پرته یې بله هېڅ پایله نه لرله.

په ورته وخت کې رئیسي ویلي، ایران له نړۍ سره ښې اړیکې غواړي، خو پر وینا یې غرب تل په سیمه کې ناندرۍ او جګړې جوړې کړې دي.

نوموړي زیاته کړې،د امریکامتحده ایالت د همدې موخو لپاره په افغانستان کې وه او تر ۲۰  کاله جګړې وروسته یې په افغانستان کې هېڅ راز ابادي او بنسټیز کارونه نه دي کړي.

هغه پر نړیوالو غږ کړی،چې د اوکراین له جګړې سره هم مهاله دې د افغانستان پر بشري ناورین تمرکز وکړي او اجازه دې نه ورکوي،چې روان بد اقتصادي وضعیت د انسانانو ژوند واخلي او یا هم میلیونونه افغانان کډوال شي.