د ۲۰۳ منصوري قول اردو قوماندان ایوب خالد د خپلواکۍ نمانځلو په موخه جوړو شویو مراسمو کې د وینا پر مهال وویل، د دغه ورځې نمانځل په ځوانانو کې د خپلواکۍ جذبه پیاوړي کوي ، چې نیکونو او پلرونو یې په څنګه شرایطو او کمو امکاناتو بهرني یرغلګر شړلي دي.
خالد زیاته کړه:« افغانستان ته چې هر اشغالګر راغلی دی، زموږ له نیوکونو او پلارونو نیولې تر دې نسله پورې، هر اشغالګر چې راغلی دی، بېرته شړل شوی او خپله ماته یې منلې ده، یا تباه شوی دی یا پر تېښته بریالی شوی دی. »
د ۲۰۳ منصوري قول اردو قوماندان ایوب خالد همدا راز وایي، د نړۍ یو ځواک هم د اسلامي امارت پر ځواکونو بریا نه شي تر لاسه کولی او په مخامخ کېدو سره به له ماتې سره مخ کیږي.
په ورته وخت کې خالد خلکو ته ډاډ ورکړ،چې د خپل خوندیتوب په اړه دې اندیښنه نه کوي.
د خپلواکۍ ورځې په رارسیدو سره یو شمیر ولایتونو کې ځوانان له ملي بېرغونو سره واټونو ته را ووتل،چې مخنیوی یې وشو،خو د پکتیا امنیه قوماندان محمد عمر مخلص بیا وایي، دغه ولایت له ورته اقداماتو سره نه دي مخامخ شوي.
هغه زیاته کړه:« زموږ خوا ته د بېرغ مسله ډېره مطرح نه ده،ځکه پر دې باندې پوهېږي، چې عامه پوهای شوی دی. موږ ته بېرغ مهم نه دی. بېرغ باید هغه مهم وي،چې اسلامي وي، شرعي بېرغ وي، په کوم بېرغ چې قرباني ورکړل شوي وي، نو دا ډېر مهم نه دی، مهم زموږ یوالی دی.»
۱۰۳ کاله وړاندې غازي امان الله خان افغانستان یو خپلواک هېواد اعلان کړ،داسې هېواد چې ټولې پریکړې پر خپله وکړای شي او د هېڅ زبرځواک تر کنټرول لاندې نه وي.
