که څه هم سرپرست حکومت په خپله واکمنۍ کې د نشه یي توکو پر وړاندې جدي مبارزه پیل کړې؛ خو له دې سره سره، وخت ناوخت د سیمې هېوادونه په افغانستان کې د نشه يي توکو د کښت او د سیمې هېوادونو ته یې د قاچاق په تړاو اندېښنې ښيي.
تازه د ګډو ګټو خپلواکو هېوادونو په خپله وروستۍ ناسته کې چې په بلاروس کې ترسره شوې، یو ځل بيا د نشه يي توکو د قاچاق په تړاو اندېښنه ښودلې.
یادو هېوادونو په یوه خبرپاڼه کې چې د روسیې د بهرنیو چارو وزارت له لوري خپره شوې یاده مسئله د دې هېوادونو لپاره ستر ګواښ ګڼلی.
د خبرپاڼې یوه برخه:« موږ له افغانستانه د سیمې هېوادونو ته د متامفټامین، کوکائین او د بنګو په ګډون د صنعتي نشهيي توکو د قاچاق په تړاو اندېښمن یو. موږ بیاځلې د نړیوالې پدیدې په حیث، د نشهيي توکو پر وړاندې په ملي او نړیواله کچه پر ګډې مبارزې ټینګار کوو.»
د سیاسي چارو شنونکي په تېرو دوو کلونو کې د نشه یي توکو پر وړاندې د سرپرست حکومت مبارزه په تېرو دوو لسیزو کې بې سارې ګڼي.
دوی د نشه یي توکو د قاچاق په تړاو د سیمې هېوادونو اندېښنې بې ځایه ګڼي او له ورته څرګندونو څخه په نړیواله کچه د فشار واردول او د سرپرست حکومت د بدنامولو هڅه ګڼي.
د سیاسي چارو شنونکی توریالی ځاځی وايي:« دا پر افغانستان باندې د مرکزي اسیا هېوادونو نیوکې دي، لومړی دا ده چې نه د افغانستان خلک او نه هم د اسلامي امارت نور باید دغو نیوکو ته ارزښت ورنه کړي او تفسیره هم ورباندې ونه کړي، ځکه دوی دلته سیاسي موخې لري دا یو نوع سیاسي فشارونه دي چې پر افغانستان باندې یې واردوي.»
ځینې نور بیا وايي، غوښتنه یې دا ده که چېرې له افغانستانه د نشه يي توکو په برخه کې د سیمې له هېوادونو سره په واقعي مانا اندېښنې موجودې وي او په دې تړاو کره شواهد لري نو له افغان حکومت سره دې شریکې کړي.
د دوی په بارو د ورته مسائلو سیاسي کول د افغانستان په ګډون د هېڅ هېواد په ګټه نه دي او په خبره یې غوره دا ده چې د حل لپاره یې په ګډه کوټلي ګامونه پورته شي.
د سیاسي چارو شنونکی نجیب الله جامع وايي:« دوی په کار ده هغه مشروع غوښتنې چې لري له کابل سره شریکې کړي او په دغه برخه کې ګډ کار ته شرایط برابر کړي. د مسایلو سیاسي کول دا د ستونزې حل نه ده، مرکزي اسیا، سوېلي اسیا او افغانستان ګډې اړیکې لري.»
د ګډو ګټو هېوادونه داسې مهال له افغانستانه سیمې ته د نشه یي توکو د قاچاق په تړاو اندېښنه ښيي چې د ملګرو ملتونو ګڼو اړونده ادارو په تېرو دوو کلونو کې د نشه يي توکو پر وړاندې شوې مبارزه د افغانستان په تاریخ کې بې سارې ګڼي.
