که څه هم له پاکستانه پر زور د افغان کډوالو راشړل له نړیوالو غبرګونونو سره مخ دي، خو پاکستان نه یوازې دغه لړۍ درولې نه ده، بلکې ورځ تر بلې یې لا پسې پراخه کړې هم ده.
په دې اړه تړاو تر ټولو تازه غبرګون کې د آسيا پاسيفیک د کډوالو حقونو شبکې په پاکستان کې د افغان کډوالو ژوند او له هغوی سره ناوړه چلن خواشینونکی بللی او له پاکستان يې غوښتي چې د افغان کډوالو پرضد د بې بنسټه بندیزونو او بشري حقونو سرغړونې پای ته ورسوي.
دې شبکې په زور د افغان کډوالو پر اخراج هم نيوکه کړې او ويلي يې دي چې پاکستان بايد په ډله ییز ډول د افغان کډوالو د اخراج پروسه هم په سملاسي توګه ودروي.
د اسيا پاسيفیک د کډوالو حقونو شبکې ویلي: « د اسيا پاسیفیک د کډوالو حقونو شبکه د پاکستان له حکومت په کلکه غوښتنه کوي چې په ډله ييز ډول د افغان وګړو شړل سملاسي ودروي او د نړيوالو حقوقي او بشري ژمنو پر بنسټ د ټولو کډوالو د خونديتوب او درناوي ډاډ ورکړي.»
د کډوالو د حقونو یادې شبکې په خپله اعلاميه کې زياته کړې، پاکستان باید په خپله خوښه د کډوالو ستنولو اصول مراعات او د افغان کډوالو پر ضد له بشري حقونو سرغړونو ته د پای ټکی کېږدي.
د اسيا پاسيفیک د کډوالو حقونو شبکې په دې اړه ویلي: « له پاکستان غوښتنه کوو چې بې له ځنډه عملي او څرګند ګامونه واخلي. سره له دې چې د کډوالو ستنولو اصول مراعات کړي، ترې غواړو چې د پناه غوښتنې عادلانه، مؤثره او اسانه بهير بېرته فعال کړي او د افغان کډوالو پر ضد د بې بنسټه بنديزونو او له بشري حقونو سرغړونې پاى ته ورسوي.»
که څه هم د کډوالو او راستنېدونکو چارو وزارت په دې اړه څه نه وایي، خو له وړاندې یې له پاکستان غوښتي چې د افغان کډوالو د ستنولو پروسه اصولي کړي.
د سیاسي چارو شنونکي بیا د کډوالو په اړه د اسيا پاسيفیک د کډوالو حقونو شبکې له دريځ ننګه کوي او ټينګار کوي چې پاکستان دې نړيوالو قوانينو ته د ژمنتيا په ثابتولو سره، د افغان کډوالو پر وړاندې نرمښت اختيار او حقونه دې يې تامين کړي.
د سیاسي چارو شنونکی ابولحسن صالحي وايي: « د اسیا پاسیفیک د کډوالو حقونو شبکې اقدام د ستایلو وړ دی او باید د همدې شبکې د حقوقي چوکاټ له مخې پر پاکستان فشار راوړل شي، ترڅو د دې هېواد له خوا د کډوالو په اړه نړیوال قوانین محترم وګڼل شي او د پاکستان له خوا د کډوالو حقونه رعایت شي او دغه راز د کډوالو له جبري اخراج لاس واخلي. باید افغانستان کې د راستنېدونکو کډوالو لپاره د بیا مېشتېدلو زمینه برابره شي او دغه راز نورې نړیوالې ادارې او د بشري حقونو ملاتړ بنسټونه هم پر پاکستان فشارونه زیات کړي، ترڅو دغه روانه لړۍ ودروي.»
دا په داسې حال کې ده چې پاکستان د یوه بې مخینې اقدام له مخې، د ۲۰۲۳ زېږدیز کال په اوږدو کې له دې هېواده د افغان کډوالو جبري ستنولو لړۍ پیل کړه او تر اوسه پورې یې له یو میلیون زیات کډوال افغانستان ته ستانه کړي دي.
د پاکستان دغه ګام د افغانستان او نړيوالو له کلکو نیوکو سره مخ دی.
