که څه هم په کندهار ولایت کې وروستي ورښت له یوې خوا د بزګرو او کروندګرو هیلي راپیدا کړي، خو له بلې خوا د ښار او ولسوالیو تر منځ وران شویو پلونو او ښار کې نامنظم کانالزیسیون مسافر او ښاریان له ستونزو سره مخ کړي دي.
ښاریان نيوکه کوي،چې مسوولین د باران د شدت له اټکل خبر وو،خو بیا یې هم ښار کې د باراني اوبو لپاره چمتوالی نه وو نيولی.
د کندهار ښار یو تن اوسېدونکی وايي:«تاسو ګورئ، چې ټول سړکونه اوبو پر سر اخیستي دي. لښتي او ویالې یې پر وخت نه دې پاکې کړې، چارواکي د دغه باران له اټکله خبر وو، خو بیا یې هم پر وخت اقدام نه دی کړی.»
د کندهار والي محمد یوسف وفا له ښاروالیو او امنیتي مسوولینو غوښتي،چې د باران له امله په ستونزو کې راګېر وګړو سره دې مرسته وکړي.
د کندهار والي محمد یوسف وفا وايي:« زه له ټولو امنیتي، فوایدعامې، ښاروالۍ او نورو اړوند ارګانونو غوښتنه کوم،چې د باران، سېلابونو له امله له خلکو سره د ستونزو پر مهال مرسته وکړي او له ګواښونو یې وژغوري.»
کندهار کې له تېرې شپې راهیسې د باران ورښت پیل شوی،چې د دغه ولایت په یو شمېر ولسوالیو کې د زیات ورښت له امله سېلابونه راوتلي او له ښار سره نښلېدونکې لارې یې بندې کړي.
د مالوماتو له مخې ،د وچکالۍ د ختمېدو لپاره ۱۵۰ملي متر ورښت ته اړتیا ده، خو دغه اندازه تر اوسه یوازې ۵۴ ملي متره ته رسېدلې ده.
