خاکرېز او شاه ولیکوټ هغه ولسوالۍ دي،چې یو ځل بیا د حکومتي ځواکونو او طالبانو ترمنځ په کې سختې جګړې پیل شوي دي.
ځايي چارواکي وايي، دواړو ولسواليو کې يې ځمکني عملیات پیل کړي او ډېر ژر به په کې هوايي ځواکونه هم خپل عملیات پیل کړي.
د کندهار د امنیه قوماندانۍ ویاند جمال ناصر بارکزی وايي:« ډېر ژر به شاه ولیکوټ ولسوالۍ هم د ارغنداب ولسوالۍ په څېر د طالبانو له شتونه پاکه کړو. خاکرِېز ولسوالۍ کې د وسله والو له خوا پر افغان امنیتي او دفاعي ځواکونو برېدونه شوي، چې ځوابیه برېدونو کې وسله والو طالبانو ته درنه مرګ ژوبله اوښتې او پر شا تمبول شوي دي. »
له تېرو اوو میاشتو راهیسې کندهار کې طالبانو په پنځو نورو ولسواليو کې سخته جګړه پیل کړې او ګڼې سيمې یې له افغان ځواکونو نېولي دي، خو چارواکي یي ردوي.
د کندهار والي روح الله خان زاده وایي: « طالبانو هېڅ وخت جنګ نه دی بند کړی. امنیتي او دفاعي ځواکونه هر وخت چمتو دي،چې د دوی برېدونو ته ځواب ورکړي.»
د حکومت پخوانی وزیر ګل اغا شېرزی وايي، حکومت، سیاسیون او طالبان دې د جګړې نه؛بلکې د سولې پر بنسټیزو لارو چارو تمرکز وکړي.
د جګړې دا شدت د کندهار، اروزګان، زابل او هلمند تر څنګ د هېواد په یو شمېر نورو ولایتونو کې هم زیاد شوی. طالبانو د تازه نښتو په اړه تر اوسه پورې څه نه دي ویلي.
