سپین بولدک د کندهار هغه ولسوالۍ ده چې د مسوولینو په خبره هره ورځ له پاکستانه د همدې ولسوالۍ له لارې د لسګونه زره افغانیو په ارزښت صادرات او واردات ترسره کېږي.
د دې سیمې سوداګر لاهم له ګڼو ستونزو سره مخ دي چې یوه يې د صنعتي پارک نشتوالی دی.
سوداګر وایي، دغه ولسوالۍ چې له پاکستان سره د چمن له لارې وصل ده، مهمه سوداګریزه نقطه ده، خو لاهم د کارخونو جوړېدو لپاره ځانګړی صنعتي پارک نه لري.
د سپین بولدک سوداګرۍ خونې مشر محمد شفیق وايي: « که د صنعتي پارک لپاره موږ ته ځمکه راکړل شي، نو په دې سره به تجاران ډېر غټ صنعت وکړي او خپله پانګونه به وکړي. له یوې خوا به وطن پر ځان بسیا شي او له بلې خوا به د کار زمینه به برابره شي.»
سوداګر سعد الله بیا وايي: « صنعتي پارک ته بلکل دا زموږ سوداګر لېواله دي، که صنعتي پارک ولري زموږ بولدک ولسوالۍ کې به سوداګر پانګونې وکړي.»
په ورته وخت کې د کندهار د صنعت او سوداګرۍ ریاست مسوولین وایي، د سپین بولدک لپاره د صنعتي پارک جوړېدو پلان شته، خو د برېښنا نشتوالی د کارخونو د جوړېدو اصلي خنډ دی.
د کندهار صنعت او سوداګرۍ رییس قاري حمد الله یعقوب وايي: «هو! په هغه کې موږ مجلس کړی، ورته ویلي مو دي چې هغه ځمکه موږ ته تثبیت کړي. هلته برق نشته په جنراټورونو کارخونې ډیرې ګراني تمامیږي. نو انشاالله چې هلته د برق ترتیب برابر شي.»
د سوداګرو په خبره دې ولسوالۍ کې د صنعتي پارک او کارخونو جوړول به نه یوازې شته ستونزې را کمې کړي، بلکې ورسره به لسګونه ځوانانو ته کاري زمینې هم برابرې شي.
سوداګر او ځايې اوسېدونکي ټینګار کوي چې د سپین بولدک صنعتي پارک جوړیدو سره به دا ولسوالۍ د تولید او صادراتو په داسې مرکز بدله شي چې له امله به يې د هېواد په عوایدو کې د پام وړ بدلون رامنځ ته شي.
