Skip to content
د کندهار دهلي بند کې د اوبو د کمښت او د ارغنداب رود د وچېدو ترڅنګ اوس د دغه ولایت په ناحيو کې هم تر ځمکي لاندې د اوبو سطحه په بې ساري توګه ټيټه شوې او آن ځينو سيمو کې برمي وچي او خلک د څښاک پاکو اوبو د موندلو په برخه کې له ستونزو سره مخ دي.
ځايي خلک وايي، ځيني کورونه او سيمي له همدې امله خالي او خلک ترې تللي، چې د څښاک پاکي اوبه په کې نشته دی.
د کندهار ښار یو تن اوسېدونکی وايي:« اوس دا د سره پل سیمه کې ډېری سرایونه خالي دي، د کرایې لپاره یې څوک نه شته دي. دا سیمه اوبه نه لري،نوځکه څوک ورته زړه نه ښه کوي. دلته اوس ډېری سرایونه همداشان خالي دي.»
د کندهار ښار په ځينو برخو کې تر ځمکې لاندې اوبو کچه له ۱۰ څخه تر ۱۶ مترو پوري ټيټه شوې ده او لاهم د ټيټېدو په حال کې ده.
د یاد ولایت اوسېدونکي وايي، تر څو، چې دولت د کرنيز سکټور په ګډون د اوبو ضايعاتو د مخنیوي لپاره ګامونه پورته نه کړي، تر ځمکي لاندې د اوبو کچه نه شي لوړېدلای.
د کندهار یو تن اوسېدونکی انجنیر نیاز محمد وايي:« حکومت باید د اوبو رسولو سیسټم جوړ کړي. خلک،چې اوس په کومه طریقه اوبه کاروي، باید مخنیوی یې وشي او باید دا اوبه په معیاري ډول وکارول شي. د دې پر ځای چې خلک خپله برمه ووهي، که په دوی ته په نل کې اوبه ورشي، بیا دا اوبه ډېرې سپما کوي.»
اخوا د یاد ولایت د اوبو رسولو ادارې مرستیال محمد عیسی خاکسار بیا وايي، دوی تر ځمکې لاندې اوبو د کچي د لوړوالي لپاره په کندهار ښار کې د خپلسرو برمو او څاګانو پر کندلو بنديز لګولی دی،خو د نل له لارې ښاري سيمو ته د څښاک پاکي اوبه ورکوي.
خاکسار زیاته کړه:«موږ په هغو سیمو کې د برمې وهلو اجازه ورکوو،چې هلته مو د اوبو رسولو شبکې نه وي، نلونه نه ور تېر شوي،نو بیا د اړتیا پر اساس ورته د شپږ اینچه برمې وهلو اجازه ورکوو.»
په کندهار ښار کې دا مهال تر ۱۰۰ زرو زيات کسان ژوند کوي،خو د کندهار اته زره کورنۍ د څښاک پاکو اوبو ته لاسرسی لري.
د کندهار ترڅنګ د سويلي حوزې په يو شمېر نورو ولایتونو کې هم سږ کال د څښاک د پاکو کمښت خلک له ستونزو سره مخ کړي دي.
