د کندهار ولایت اوسېدونکي شکایت کوي چې کله د ډالرو نرخ لوړ شي د خوراکي توکو او تیلو بیې تل وسره لوړیږي، خو اوس چې د افغانیو پر وړاندې د ډالرو بیه راټیټه شوې، د خوراکي توکي په پخوانۍ بیه دي.
دغه راز دوی وايي،د خلکو اقتصادي وضعیت ښه نه دی او په خبره یې حکومت باید د توکو بیې کنټرول کړي.
د کندهار ښار یو تن اوسېدونکی قدرت الله وايي:« ډالر چې لوړ شي د توکو بیې سمدستي ورسره لوړېږي خو چې ښکته شي نو بیې هېڅ نه ورسره راښکته کېږي او بیا ورته دا لار پیدا کوي چې موږ په تېرې بیې توکي اخېستي دي.»
د کندهار ښار یو بل اوسېدونکي حمید الله وايي:« باید چې د توکو بیې اوس راټيټې شي هغه که اوړه دي، که نخو دي که لوبیا او همداسې چای او بوره د ټولو بیې باید راښکته شي.»
په ورته وخت کې د کندهار ښاروالۍ مسوولین بیا وايي، د بیو د لوړېدو مخنيوي او د بازار کنټرول په موخه يې له سوداګرو سره په همغږۍ يوه کمېټه جوړه کړې، تر څو د توکو د بيو لېست وټاکي.
د کندهار ښاروالۍ ویاند سیف الله عاصم وايي:« د کندهار ښاروالۍ د بیو کنټرول په موخه له سوداګرو سره غونډه جوړه کړې، تر څو د خوراکي او غیر خوراکي توکو بیې کنټرول کړي، په دغه غونډه کې پرېکړه په دې وشوه، چې د بیو په کنټرول کې به د امکان ترحده بدلون راشي او هم به د کندهار ولایت مقام، ښاروالۍ او سوداګرۍ خونه په ګډه همکارۍ او همغږۍ د خوراکي او غیر خوراکي توکو لپاره یوه ګډه نرخنامه جوړه کړي.»
دا په داسې حال کې ده چې د اقتصادي چارو کارپوهان د ډالرو پر وړاندې د افغانیو بیې لوړېدل لنډمهالی بولي او وايي، د ډالرو پر وړاندې د افغانیو ثبات به دایمي نه وي.
د اقتصادي چارو کارپوه حکمت الله ضیا وايي: « د افغانۍ بیه به نړیوال مارکېټ کې یا نورو پولي واحدونو که هغه ډالر دي که یورو دي او که کلدارې د دوی په مقابل کې به په دومداره بڼه وي، که موږ او تاسې یې د اقتصاد له پلوه وګورو خپله د هېواد کرنسي په لږ وخت کې په ناڅاپي توګه لوړېدل خپله یو ډول ستونزه ده او د اندېښنې وړ خبره ده. زه فکر نه کوم چې افغانۍ د ډالرو په مقابل کې او یا ډالر د افغانیو په مقابل کې همداسې وساتل شي.»
د ډالرو د بیې په راټیټیدو سره د پټرولو په بیه کې کوم بدلون نه دی راغلی او اوس په بازار کې یو لیتر پټرول په ۶۱ افغانۍ پلورل کیږي.
د يادونې وړ ده، چې اوس مهال د کندهار ولایت په بازارونو کې يو ډالر په ۶۹ افغانۍ تبادله کېږي.
