د کرېکټ یوه زړور افغان لوبڅار له مسلک سره څه چې ان له نړۍ سره خدای په اماني وکړه.
بسم الله جان شینواري د کرېکټ لوبڅارۍ اوږده تجربه درلوده او د افغانستان کرېکټ بورډ د لوبڅارانو (ایلیټ پلاوي) غړی و.
نوموړي په ۳۴ یو ورځنیو نړیوالو، ۲۶ شل اوریزو نړیوالو، ۳۱ فرسټ کلاس، ۵۲ لېست اې او ۹۶ کورنیو شل اوریزو سیالیو کې لوبڅاري کړې.
څو ورځې وړاندې يې د پېښور په یوه روغتون کي د وزن کمولو عملیات وکړل او له همدې امله يې روغتيايي وضعيت نازک او بلاخره يې د دوشنبې په ماښام په روغتون کې پور پرې کړ.
کرېکټ بورډ د بسم الله جان شينواري مړینه یوه لویه ضایعه بولي او زیاتوي چي نوموړی نه یوازي یو ښه لوبڅار و بلکې د افغانستان د کرېکټ په وده کې يې هم نه هېرېدونکې هلې ځلې کړې او کارنامې ترې پاتې دي.
د کرېکټ بورډ د کورني کرېکټ مسوول نظیم جار عبدالرحیمزی وايي: « په ریښتیا هم ده چې په تېرو ۱۵ کالو کې افغان کرېکټ ته کومې هلې ځلې وکړې، د هېرولو نه دي. هغه یوازې لوبڅار نه و بلکې په هره برخه کې یې هڅې کولې. ده په خپله سیمه کې ډېر رسوخ درلود او د ډېرو لاسنیوی یې کاوه.»
د کرېکټ بورډ ویاند سید نسیم سادات وايي: « د بسم الله جان شینواري وفات په ریښتیا لویه ضایعه ده. د افغانستان د کرېکټ بورډ مشرتابه، لوبغاړي او کارکوونکي د دوی له کورنۍ سره په دې لوی غم کې ځان شریک بولي او مرحوم ته د خدای(ج) له درباره د جنت غوښتنه کوي. خدای بښلي د افغانستان نوم په نړیوالو ډګرو روښانه ساتلی و او د لوبڅارۍ په مسلک کې یې ډېر ستر خدمتونه کړي.»
ملي لوبغاړی کریم صادق چې د بسم الله جان شینواري له نږدي ملګرو دی، په ډکو سترګو په خپل ملګري خاوري اړوي.
ځيني پخواني لوبغاړي په اسانۍ د کرېکټ په ډګر کې د نوموړي د تشې ډکول ناممکن بولي.
د کرېکټ پخوانی لوبغاړی هستي ګل عابد وايي: « بسم الله جان د افغانستان او نړۍ په غوره لوبڅارانو کې یو و. نوموړی یوازې لوبڅار نه و بلکې د افغان کرېکټ په ډېرو مهمو برخو کې یې رول لوبولی. بسم الله جان خپلې سیمې او ځوانانو ته هم ډېر کارونه کړي.»
له رسمي کارونو ورها خوا، بسمالله جان شينواري په خپل کلي کې د کرېکټ ودې لپاره د کار ترڅنګ، د اړمنو لاسنيوی هم کړی.
د غني خېلو اوسېدونکي وایي، موده وړاندې په یوه پېښه کې د بسم الله جان شینواري د کورنۍ څو تنو غړیو ژوند بايلود او له همدې کبله يې په وروستيو کې د ګڼو يتيمانو سرپرستي هم کوله.
د غنيخېلو اوسېدونکی وايي: « د حاجي بسم الله جان مړینه نه یوازې د شینوارو ولس او افغانستان لپاره بلکې د نړۍ د کرېکټ لپاره هم لویه غمیزه ده.»
د غني خېلو یو بل اوسېدونکی وايي: « د ده مړینه یوازې په کورنۍ پورې اړه نه لري، بلکې پر ټول ولس او هغو یتیمانو ډېر اغېز لري چې له ده سره په چم ګاونډ کې اوسېدل او ده یې سرپرستي کوله. نن چې د ده په مرګ خپلو او پردیو ویر کاوه، لامل یې دا و چې نوموړی ډېر مخلص انسان و.»
بسم الله جان شینواري د ۲۰۱۷ کال په ډسمبر کې د لومړي ځل لپاره د عربي متحده اماراتو په شارجې کې د ایرلنډ او افغانستان ترمنځ د نړیوالې لوبې څارنه وکړه او وروستی ځل یې د روان کال د فبرورۍ پر ۱۸مه په همدې هېواد کې د امریکا او عمان ترمنځ د یوې نړیوالې لوبې لوبڅاري کړې وه.
