Skip to content
د افغانستان اسلامي امارت د کرنې او مالدارۍ وزارت د پکتیا ولایت اریوب ځاځیو، شواک، ګرده څیړۍ ، څمکنیو، جاني خیلو او احمدخیلو ولسوالیو کې پر بڼوالو ۳۶ زره میوه لرونکي نیالګي ووېشل.
د یاد وزارت مرستیال صدراعظم وایي،یو شمیر نورو ولایتونو کې هم د نیالګیو ورته ویشل په پام کې لري او نږدې راتلونکي کې به پیل شي.
هغه زیاته کړه:« تقریبا شپږو ولسوالیو کې به ۳۶ زره نیالګي کینول شي. نورو ولایتونو کې هم ورته پروګرام په پام کې لرو او نږدې راتلونکي کې به یې ویش پیل شي.»
مسئولین د دغه لسګونه زره نیالګیو ویش د نشه یي توکو د مخنيوي هڅو یوه برخه بولي او وایي، یادو شپږو ولسوالیو کې یې د غنمو اصلاح شوي تخمونه هم ویشلي،ترڅو خلک د نشه یي توکو له کرلو راوګرځوي.
د پکتیا کرنې ریاست د کرنیزو چارو امر مومند خروټی وايي:« دغه د دې لامل ګرځي، خلک د نشه یي توکو له کرلو لاس واخلي،ځکه د دغو میوه لرونکو ونو حاصل له نشه یي توکو زیات دی.»
بڼوال د لسګونه زره نیالګیو ویش ته خوشاله دي او ژمنه کوي،چې تر دې وروسته به خپلو ځمکو کې نشه یي توکي نه کري او له نورو خلکو هم غواړي،چې د نشه یي توکو له کرلو دې لاس واخلي.
د پکتیا اوسېدونکی وايي:«زما ۴۰ جریبه ځمکه ده، پلان لرو ،چې ۲۰ زره نیالګي سږ کال کینوو او پاتې۲۰ زره نیالګي راتلونکي کال کې کینوو.»
د پکتیا یو بل اوسېدونکی بیا وايي:« نشه یي توکي چې کرل کېږي،د یو جریب نشه یي توکو له ګټې د یوې ونې کینول ګټه ده. زه له خلکو غواړم،چې خپلو ځمکو کې دې د نشه يي توکو کرلو پر ځای ونې کینوي.»
بڼوال له کرنې وزارت او مرستندویه بنسټونو غواړي،چې د سړو خونو،چیک ډیمونو او حاصلاتو ته دې د بازار موندنې برخه ورسره همکاري وکړي.
