دا لومړی ځل دی چې یو اروپايي هېواد د اسلامي امارت د یوه وزارت چارواکو ته د کاري سفر بلنه ورکوي، ترڅو په بېلابېلو برخو کې د دوه اړخیزو همکاریو لپاره لار پرانیزي.
د کرنې وزارت په یوه اعلامیه کې ویلي چې دا جګپوړی پلاوی یې د مالدووا جمهوریت د کرنې او خوړو د صنعت وزارت په رسمي بلنه دا سفر پیل کړی چې د اګسټ میاشتې تر اتمې نېټې به دوام وکړي.
د یاد وزارت په اعلامیه کې ویل شوي، د کرنې وزارت پلاوی په پلان شویو تخنیکي غونډو کې د کرنې په برخه کې د اروپا پرمختللو تجربو د لېږد په تړاو هم خبرې وکړي.
د اعلایمې په یوه برخه کې راغلي: « دا سفر به د پرمختللیو اروپايي تجربو د لېږد، د کرنیزو څېړنو د ظرفیتونو پیاوړتیا، د بوټو ساتنې، د عصري او چاپېریال دوستانه ټکنالوژیو د معرفي کولو او د افغانستان او مالدووا جمهوریت ترمنځ د دوامدارو علمي او تخنیکي همکاریو د لا پراختیا لپاره یو مهم او اغېزناک ګام ثابت شي. همداراز د دې سفر علمي او تخنیکي لاسته راوړنې به د هېواد د کرنې عصري کولو، د بزګرانو د ملاتړ، د کرنیزو تولیداتو د کیفیت او حاصلاتو د لوړولو او د دوامدارې کرنیزې ودې لپاره په عملي او اغېزمن ډول وکارول شي.»
د کرنې، اوبو لګولو او مالدارۍ وزارت د نړیوالو همکاریو د پراختیا، د کرنیزو څېړنو د پیاوړتیا او د پرمختللو کرنیزو ټکنالوژیو د را لېږد په موخه له بېلابېلو هېوادونو او نړیوالو بنسټونو سره خپلې اړیکې پراخوي.
په همدې لړ کې د یاد وزارت لوړ پوړی پلاوی د مالدووا جمهوریت د کرنې او خوړو صنعت وزارت په رسمي بلنه اروپا ته سفر کړی، ترڅو د دواړو هېوادونو ترمنځ د کرنې، بوټو ساتنې او څېړنیزو همکاریو د پراختیا لپاره نوې لارې پرانیزي.
په ورته مهال، یو شمېر شنونکي بیا دا سفر د سیاسي تعامل، اقتصادي او دوه اړخیزو همکاریو له پلوه خورا مهم بولي او وايي، ممکن د اسلامي امارت او اروپایي هېوادونو ترمنځ په اړیکو کې موجود کنګل مات کړي.
د چارو شنونکی عبدالجبار ساپی وايي: « هم له نړۍ او هم له اروپا سره اړیکې جوړول د افغانستان په ګټه دي. په کرنیزه برخه کې د دوی له املکاناتو، مکانیزه کولو او د دوی له پروګرامونو ګټه اخستل، په دې اړه بحثونه کول او د اړیکو شبکه جوړول د افغانستان لپاره ډېر ارزښت لري. موږ باید زده کړو چې څنګه کولی شي د نړۍ له فرصتونو او امکاناتو ګټه واخلو او خپل زراعت مکانیزه کړو.»
د دوی په خبره، که دا سفر د هغه څه پر بنسټ شوی وي چې د کابل پر وړاندې د اروپایي هېوادونو په موجوده دریځ کې د بدلون له مخې وي، نو په نږدې راتلونکې کې ممکن د داسې زیاتو سفرونو شاهدان و اوسو.
مالدووا د ختیځې اروپا یو په وچه کې ایسار هېواد دی چې په پخواني شوروي اتحاد کې شامل و، خو کله چې د ۹۰ یمې لسیزې په پیل کې پخوانی شوروي اتحاد مات شو، نو مالدووا د ۱۹۹۱ میلادي کال د اګسټ په ۲۷ خپله خپلواکي علان کړه.
