د کرنیزې پرمختيا صندوق لپاره د ودانۍ جوړولو ډبره يې کېښوده او د کرنې وزارت چارواکي له همدې مراسمو په ګټنې په ځينو برخو کې پر پاتې راتلو هم اعتراف کوي.
دوی که څه هم د ځينو کرنيزو ستونزو حل خپله لاسته راوړنه يادوي، خو دا هم مني چې د تېرو څلورو کلونو په لړ کې يې د بزګرانو لويې ستونزې په بشپړه توګه نه دي حل کړې.
د کرنې، اوبو لګولو او مالدارۍ وزارت معین صدراعظم عثماني وايي: « لکن هغه ستونزې چې اوس هم ځینې بزګران ورسره مخامخ دي، هغه ستونزې موږ نه دي حل کړې؛ خو زموږ کوشش دا دی چې هغه شرکتونه چې په زراعتي برخه کې کار کوي مګر د پيسو نه لرلو له امله یې کارونه کمزوري شوي یا یې فابریکې کمزورې شوې او یا نورې اقتصادي ستونزې لري، موږ دېته تیار یو چې دوی ته پیسې ورکړو.»
نوموړی د کرنې وزارت په مالي ملاتړ د ځينو هغو شرکتونو د فعاليتونو بيا پيل کېدو خبره هم کوي چې له مودې راهيسې یې فعاليتونه د مالي ستونزو له امله درېدلي وو.
عثماني په دې اړه وايي: « په دې ودانۍ باندې تقریبا ً ۶۹ میلیونه افغانۍ لګښت راځي. د دې ودانۍ لپاره له دې وړاندې خپل ساختمان نه و، خو له دې وروسته به خپله ودانۍ ولري، آدرس به یې معلوم وي او خلک به خپل اداري کارونه دلته خلاصوي.»
بله خوا، کرنې وزارت د کرنیز سکټور د ودې لپاره د خپلو هڅو په دوام، د کرنیزې پرمختيا صندوق لپاره د ۶۹ میلیون افغانيو په ارزښت ودانۍ جوړوي او قراردادي شرکت يې په ۱۸ مياشتو کې د چارو د بشپړولو ډاډ ورکوي.
د خصوصې شرکت مسوول نورالامین شفق وايي: « د اسلامي امارت له مشرانو مو هیله دا ده چې دا ډول نورې عام المنفعه او توسعه يي پروژې هم پيل کړي، ترڅو له یوې خوا مو هېواد آباد او له بلې خوا خلکو ته د کار زمینه برابره شي.
د کرنې، اوبو لګولو او مالدارۍ وزارت د چارواکو په خبره، افغانستان د کرنې او مالدارۍ په برخه کې تر ډېره پر ځان بسیاینې ته رسېدلی او په لږو برخو کې له نورو هېوادونو واردات کوي.
