د کانونو او پټرولیم وزارت وايي، د دې وزارت د پالیسۍ او پروګرامونو مرستیال عبدالرحمن قانت د یکشنبې په ورځ د چین ولسي جمهوریت د بهرنیو چارو وزارت د اسیایي چارو ادارې جنرال کونسل وي هو اشیانګ، په کابل کې د چین سفیر، د مس عینک پروژې د قراردادي شرکت مرکزي او د افغانستان برخې له مسوولینو او مل پلاوي سره لیدلي.
د وزارت ویاند همایون افغان وايي، په دې لیدنه کې جنرال کونسل د افغانستان او چین ترمنځ لرغونې او دوستانه اړیکې ارزښتناکې بللې دي او د مس عینک پروژې د چارو د پرمختګ په اړه یې بحث او نظرونه شریک کړي.
افغان زیاتوي: « د پلاوي رییس د یادې پروژې د پرمختګونو، ستونزو، وړاندیزونو او اړتیاوو په اړه معلومات وړاندې کړل او اړوند موضوعات یې د وزارت له مشرتابه سره شریک کړل.»
د کانونو او پټرولیم وزارت ویاند دغه راز وايي، د دې وزارت د پالیسۍ او پروګرامونو مرستیال د مس عینک پروژې د عملي کار ژر پيل کېدو باندې ټینګار کړی.
د هغه په خبره: « د کانونو او پټرولیم وزارت د پروګرامونو مرستیال د چیني پلاوي د نظریاتو او وړاندیزونو تر اورېدو وروسته وویل چې د مس عینک پروژه د دواړو هېوادونو او د افغانستان د خلکو لپاره ځانګړی اهمیت لري. ښاغلي عبدالرحمن قانت د دې پروژې د عملي کار ژر پیل باندې ټینګار وکړ او زیاته یې کړه چې د پروژې د بشپړ پیل پر وړاندې هېڅ ډول ستونزه شتون نه لري او قراردادي شرکت باید ژر تر ژره خپلو ژمنو ته رسېدنه وکړي.»
مس عینک کان د کابل سوېل ختیځ پلو ۴۰ کیلومټرۍ کې د لوګر ولایت په بې ثمر ساحه کې موقعیت لري. دغه کان د نړۍ په کچه د مسو دویمه لویه زېرمه ګڼل کېږي.
د دې کان د سپړلو قرارداد په ۱۳۸۷ لمریز کال د چین اېمسيسي شرکت ته په قرارداد ورکړل شوی، خو لایې هم د استخراج عملي چارې نه دي پيل شوې.
