د سره صلیب نړیوالې کمېټې(آیسيآرسي) د یوې خبرپاڼې په خپرولو سره ویلي، د نورستان کامدېش او برګمټال ولسوالیو ته د غځېدلې لارې له خلاصېدو وروسته یې د دې سیمو بېځایه شویو سره د مرستو لړۍ پیل کړه.
په خبر پاڼه کې دغه راز راغلي، دا مرستې د افغان سره میاشتې او خوړو نړیوال سازمان(ډبیلواېفپي) په ګډو همکاریو پیل شوې دي.
د خبرپاڼې له مخې، د خوړو او درملو بنسټیزو اړتیاو ته د خلکو ستونزمن لاسرسۍ یوه جدي ننګونه بلل کېږي چې د حل په موخه یې هڅې هم پیل شوې دي.
د سره صلیب نړیوالې کمېټې په خبرپاڼه کې راغلي: « له څه باندې شپږو اوونیو راهیسې د نورستان برګمټال او کامدېش ولسوالیو کې خلک خوراکي توکو، درملو او نورو اړینو خدمتونو ته لاس رسۍ نه لري. اوس د سره صلیب نړیواله کمېټه، د افغانستان سرې میاشتې ټولنه او د خوړو نړیوال پروګرام، خواړه، روغتیايي توکي او نورې حیاتي مرستې استوي.»
د دې کمېټې د خبرپاڼې پر بنسټ، په کامدېش او برګمټال کې ټولټال ۱۳۷ زره خلک ژوند کوي چې په فرضي کرښه د افغان امنیتي ځواکونو او پاکستاني ملېشو د جګړې له امله یې ډېری نورو سیمو ته بېځایه شوي دي.
له دې سره همهاله، سیمیز مسوولین وايي اوس مهال په برګمټال او کامدېش کې امنیتي وضعیت بېرته عادي حالت ته ګرځېدلی او د جګړې له امله بېځایه شوي بېرته خپلو استوګنځیو ته راګرځي.
د نورستان والي ویاند فریدون صمیم وايي: « د والي صاحب په امر له خلکو سره مرستې شوې او لاهم روانې دي. موږ خپلو ټولو ولسونو ته په دې برخه کې ډاډ ورکوو چې د نورستان ولایتي اداره له بېلابېلو مرکزي ادارو سره په جریان کې دي چې دغو ولسوالیو ته نورې مرستې هم را جلب کړي.»
بله خوا، د اقتصادي چارو شنونکي د فرضي کرښې پر دواړو غاړو مېشت ولسونه د هغو اقتصادي ناورینونو برخه بولي چې د پاکستان پوځي رژیم د نورو غمیزو ګاللو ترڅنګ، له ژورو اقتصادي ستونزو سره مخ کړي.
د دوی په خبره، نړیوال بشري سازمانونه د دې مسوولیت لري چې په ملکي سیمو کې د ناکراریو مخینوي لپاره پر ښکېلو اړخونو فشار زیات کړي، ترڅو په راتلونکي کې د ورته غمیزو مخنیوی وشي.
د اقتصادي چارو شنونکی عبدالنصیر رښتیا وايي: « د ملګرو ملتونو سازمانونه باید له پاکستان غوښتنه وکړي چې پر افغانستان له برید کولو لاس واخلي، ترڅو هغه خلک بېرته خپلو مېنو ته ستانه شي چې د ډیورنډ فرضي کرښې په اوږدو کې ژوند کوي.»
د نورستان ولایت کامدېش او برګمټال ولسوالیو ترمنځ عمومي لار چې فرضي کرښې ته په ډېر نږدې واټن کې پرته ده، له هغې وروسته وتړل شوه چې شاوخوا دوه میاشتې وړاندې پاکستاني مېلشو په دې لار د ملکي وګړو روان موټر په نښه کړ، یوه ډاکټره او د هغې زوی یې شهیدان کړل او خاوند یې ټپي شو.
دغه لار د اپرېل په ۱۴مه د دواړه غاړو قومي مشرانو په هڅو او د خبرو اترو او جرګې له لارې خلاصه شوه.
