«روسیه او اسلامي نړۍ» ترسرلیک لاندې د کازان نړیوال کنفرانس ۱۶ مه دوره د روسیې په کازان ښار کې پیل شوه.
دغه ناسته د اسلامي هېوادونو او روسیې ترمنځ د سوداګريزو، اقتصادي، علمي او فرهنګي اړیکو پیاوړتیا لپاره هر کال په مې میاشت کې ترسره کېږي.
په دې غونډه کې د افغانستان په استازولۍ د سرپرست حکومت د تخنیکي او مسلکي زده کړو ادارې پر مشرۍ یوه پلاوي ګډون کړی.
د تخنیکي او مسلکي زده کړو ادارې ویاند نثار احمد الیاس وايي:« د افغانستان اسلامي امارت د تخنیکي او مسلکي زده کړو ادارې سرپرست مولوي غلام حیدر شهامت د روسیې او اسلامي نړۍ په نوم د کازان نړیوال کنفرانس په ۱۶ پړاو کې د ګډون لپاره د روسیې کازان ښار ته سفر وکړ. نوموړی به د افغانستان اسلامي امارت او د تخنیکي او مسلکي زده کړو ادارې په استازیتوب وینا کوي. دغه کنفرانس به د روانې میاشتې تر ۲۸ نېټې ادامه ولري.»
په ورته مهال، د اوبو او انرژۍ سرپرست عبداللطیف منصور په ګډون هم د درېیوو ورځو لپاره د ازبېکستان انرژۍ پنځم نړیوال کنفرانس پیل شوی دی.
د دې وزارت ویاند مطیع الله عابد په یاد کنفرانس کې د ګډون موخه د سیمې پر کچه له انرژۍ د استفادې او همکارۍ جلبول یادوي.
عابد زیاتوي:« د اوبو او انرژۍ سرپرست ملا عبداللطیف منصور او ورسره ملي پلاوي د ازبېکستان د انرژۍ پنځم نړیوال کنفرانس کې د ګډون په موخه په درې ورځني رسمي سفر پلازمېنې تاشکند ته لاړ. ښاغلی منصور به په دې کنفرانس کې د نوې کېدونکې انرژۍ او نوې ټکنالوژۍ په برخه کې د همکاریو او دغه راز د شته ننګونو په برخه کې خبرې ولري.»
د اقتصادي چارو شنونکو په باور، که سرپرست حکومت د یوې ځانګړې او ټاکل شوې موخې پر بنسټ په دې ډول ناستو کې ګډون کوي، کېدای شي دغه ناستې د افغانستان لپاره ګټورې تمامې شي.
د اقتصادي چارو شنونکی استاد مسعود وايي: « له اقتصادي پلوه ګاونډي هېوادونه له افغانستان د آبي امتیازونو اخیستلو هڅه کوي؛ افغانستان باید په بدل کې له دغو هېوادونو انرژيکي امتیازونه ترلاسه کړي. موږ له تاجیکستان، ازبېکستان، ترکمنستان او ایران برېښنا واردوو، نو باید ټاکلي اهداف ولرو.»
د سیاسي چارو شنونکي هم دې ډول ناستو ته خوښ دي او زیاتوي چې دا ناستې کولی شي د افغانستان د سیمې هیوادونو کې ځانګړی ځای خپل کړي او په دې ډول د سرپرست حکومت د رسمیت پيژندلو لپاره لار هواره شي.
د سیاسي چارو شنونکی خلیل احمد نادم وايي: « د منځنۍ آسیا هېوادونه د سوېلي آسیا له هېوادونو سره او د افغانستان لوېدیځ هېوادونه له ختیځو هېوادونو سره د نښلولو زمینه برابره کړي. دا د افغانستان لپاره مهمه ده او که چېرې په راتلونکي کې د نړۍ له خوا پر رسمیت پېژندنه هم مساعده شي، ممکن یو دلیل یې همدا وي.»
په داسې حال کې چې لا تراوسه سرپرست حکومت د هېڅ هېواد له لوري پر رسمیت نه دی پېژندل شوی، خو استازي یې د سیمې پر کچه او نړیوالو ناستو کې ګډون کوي.
د ځینو نورو شنونکو په باور دا په خپله د غیر رسمي تعامل بڼه لري.
