د کارو او ټولنيزو چارو سرپرست وزیر عبدالمنان عمري د یوه پلاوي پر مشرۍ د قطر پر رسمي بلنه دوحې ته تللی او هلته به له قطري چارواکو سره پر بېلابېلو موضوعاتو بحثونه او هوکړې وکړي.
د کاراو ټولنیزو چارو وزارت ویاند سمیع الله ابراهیمي وايي، سرپرست وزیر به قطر کې د مېشتو افغان کاریګرو ستونزو ته د قانوني لارو چارو پر لټولو سربېره په یو لړ نورو موضوعاتو هم بحثونه وکړي.
ابراهيمې زیاتوي: « د کار ټولنیزو چارو وزارت سرپرست عبدالمنان عمري د سفر موخې قطر کې د مېشتو افغان کارګرو ستونزو ته د قانوني لارو چارو لټول او تر ټولو مهمه قطر ته د ماهرو او نیمه ماهرو افغان کارګرو د اعزام پروسه ده او په دې تړاو به د قطر شاهي هېواد د مسولو چارواکو سره هر اړخیزې خبرې اترې وکړي.»
ورته مهال د چارو شنونکي، په اوسنيو شرایطو کې قطر ته د کار او ټولنیزو چارو وزارت سرپرست سفر اغېزمن ګڼي؛ خو ټینګار لري چې په هېواد دننه دې هم مسلکي کسانو ته د کار کولو زمينه برابره کړي.
د سیاسي چارو شنونکی ادریس محمدي ځاځی وايي: « مسلکي، متخصصین او هغه ځوانان او کادرونو ته چې په تعلیم او تحصیل سمبال وي موږ افغانستان کې هم ډېره اړتیا لرو، په هره اداره، هره برخه او ارګان کې موږ اړتیا ورته لرو، باید په کور دننه له دې ځوانانو کار وخېستل شي، تخصص یې په پام کې ونیول شي او کاري فرصتونه ورته زیات شي او هغه ځوانان چې دلته بیا له ګڼو ستونزو سره مخ دي، هغوی ته په بهر کې د کار زمینه برابر شي.»
د سیاسي چارو شنونکی محمد یونس ځدراڼ وايي: « موږ له دې هېواد سره که هر څومره اقتصادي برخه کې پياوړي شو او زیات قراردادونه ورسره لاسلیک شي، قطر افغانستان کې دننه پانګونه وکړي، کارخونې جوړې کړي او همدا ځوانان چې غواړي قطر ته لاړ شي هلته کار وکړي دوی ته به په افغانستان کې دننه د کار زمینه برابره شي.»
ځینې نور بیا په دې باور دي چې ګاونډیو هېوادونو ته د کاریګرو استول د افغانانو پر اقتصاد مثبت اغېز لرلی شي .
دوی وايي، دا چې په کور دننه بي روزګاره ځوانانو ته کاري فرصتونه نه برابریږي، غوره دا ده چي ګاونډیو هېوادونو ته ولېږل شي.
د سیاسي چارو شنونکی محمد شاکر یعقوبي وايي: « کاري همکاري، د کارګرو تبادله او یا د کار په موخه نورو هېوادونو ته د کارګرو لېږد د سوداګرۍ په اصولو کې یوه مهمه موضوع یادېږي. افغانستان ته ډېر مهم د کاري فضا رامنځته کول دي او دا چې د افغانستان حکومت یا مسول چارواکي څه ډول کولی شي خلکو ته د کار زمینه برابره کړي.»
د سیاسي چارو شنونکی شهسوار سنګروال وايي: « که موږ زیاتې پروژې ونه لرو، چې خپله قوه او خپل کارګر په کار باندې ولګوو؛ نو بیا ښه ده، عربي هېوادونو ته چې هغوی فزیکي قوې ته دېر زیاته اړتیا لري هلته ولېږل شي او د هغه هېواد اسعار هم افغانستان ته راځي نو زما په نظر پر اقتصادي لحاظ دا ښه کار دی.»
د کار او ټولنېزو چارو وزارت مسوولین وايي، د دي وزارت چارواکې هڅه کوي، چي د قطر په ګډون په یو شمېرو نورو هېوادونو کې هم بی روزګاره مسلکي او نيمه مسلکي کسانو ته کاري زمينه برابره کړي او د دولت پر کچه د هوکړې په اساس یې ولیږي.
