د کار او ټولنيزو چارو وزارت مسوولین وايي، په تېرو درېیو مياشتو کې يې ۳۱ زره ۲۰۰ د کار انفرادي جوازونه وېشلي او د يادو جوازونو له ډلې ۱ زر۹۲۰ قطعې جوازونه بهرنيو وګړو ته ورکړل شوې دي.
د دغه وزارت ویاند سمیع الله ابراهیمي وايي، په دې موده کې ۲۱ زره ۵۶۷ تنه په دولتي ادارو او ۹ زره ۸۰۹ تنه نور خصوصي سکټور کې پردندو ګومارل شوې هم دي.
د ابراهيمي په خبره، د کار او ټولنيزو چارو وزارت موندنې ښيي چې په تېرو درېيو مياشتو کې ۴ زره ۴۶۱ تنو په خصوصي سکټور کې د کار کولو لپاره مراجعه کړې چې له ډلې يې ۱ زر۶۸۰ تنو ته په دولتي او نا دولتي ادارو کې د کار زمينه برابره شوې.
هغه په دې اړه وايي:« د کار او ټولنیزو چارو وزارت د روان ۱۴۰۳ هجري لمریز کال په درېیمه ربع کې ۳۳ زره ۲۰۰ قطعې د کار جوازونه وېشلي او له دې لارې یې عواید راټول کړي دي. ۲۱ زره ۵۶۷ تنه هېواد په امارتي ادارو ۹ زره ۸۰۹ تنو هېوادوالو ته په خصوصي سکټور کې او همدارنګه ۱ زر ۹۲۰ تنو بهرنیو وګړو ته د کار جوازونه وېشل شوي دي. همداراز د کار او ټولنیزو چارو وزارت توانېدلی چې په تېرو ۳ میاشتو کې د کار موندنې ۹ فعال خصوصي شرکتونه و ارزوي. د بشري ځواک لوی ریاست د ارقامو له مخې، یوازې تېرو درېیو میاشتو کې د کار موندنې خصوصي شرکتونو ته څه باندې ۴ زره ۴۶۱ تنو هېوادوالو مراجعه کړې چې له ډلې یې ۲ زره ۵۶۹ تنه خصوصي او امارتي سکټورونو او موسساتو ته معرفي شوې دي.»
خو عام خلک د کار نه شتوالي له امله شکايت کوي او وايي، هر کال زرګونه کسان له پوهنتونونو فارغېږي، خو په کور دننه ورته د کار نه شتوالي له امله بهر ته په سختو لارو تګ ته مجبورېږي.
د خصوصي شرکت مسوول محمد مرجان وايي: « موږ چې کوم کاروبار لرو، د امارت کسان له موږ سره خپل کار کې همکاري کوي او که د جواز مساله وي یا بله ستونزه، ډېره ژر یې هواروي. زه د نېکل او کټارو کاروبار کوم، خو اوس مهال تعمیراتي کارونه بند دي او ښاروالۍ اجازه نه ورکوي، نو له امله یې زموږ کار ډېر ضعیف شوی دی.»
د خصوصي شرکت مسوول عبدالخالق وايي: « بدبختانه کله چې څوک دلته له پوهنتون فارغ شي، د کاروبار نه شتون له امله اړ کېږي چې بهر ته ولاړ شي. زه له دولت هیله لرم دلته خلکو ته د کار زمینه برابره کړي، ترڅو په وطن کې کار وکړي.»
د کابل اوسېدونکی محمد سعید وايي:« افغانستان کې کاروبار نه شته. اسلامي امارت باید موږ ته د کار زمینه برابره کړي.»
د اقتصادي چارو شنونکي د سرپرست حکومت له لوري د کار انفرادي جوازونو د وېش هرکلی کوي، خو پردې هم ټينګار کوي چې د لوږې او بېوزلۍ لوړ حد ته په کتو، باید خلکو ته د کار کولو زمينې برابرې کړي.
د اقتصادي چارو شنونکی عبدالنصیر رشتیا وايي: « زه فکر کوم دا ښه شمېر دی، خو باید له دې ډېره هڅه وشي، ترڅو د استخدام کچه نوره هم لوړه شي. استخدام هغه مهال کېږي چې موږ په هېواد کې د نویو پانګونو شاهدان اوسو. نو، د کار او ټولنیزو چارو وزارت باید هڅې وکړي چې هېوادوالو ته د کار موندلو لپاره له بهرنیو هېوادونو سره اړیکې ونیسي، هوکړه لیکونه ورسره لاسلیک کړي؛ ترڅو زموږ ځوانان د کار لپاره په قانوني توګه بهرنیو هېوادونو ته لاړ شي. دغه ځوانان به هلته فني او مسلکي مهارتونه زده کړي او کله چې بېرته هېواد ته راستنېږي، د هېواد په بیا رغولو کې به خپله ونډه ولري.»
د کار او ټولنيزو چارو وزارت د شمېرو له مخې، د روان کال له پيل راهیسې ياد وزارت ۹۰ زره۲۳۱ کسانو ته د کار انفرادي جوازونه وېشلي دي.
