د رئيس الوزرا پر مشرۍ د کابينې په ناسته کې د نصاب جوړولو کمېټې ته سپارښتنه شوې، چې د ښوونځيو او پوهنتونونو لپاره دې د نصاب اصلاح کولو لړۍ چټکه کړي.
له دې وړاندې داسې راپورونه خپاره شول، چې ګواکې دا ناسته په کندهار کې د اسلامي امارت مشرتابه پر مشرۍ شوې او د نصاب پر جوړولو سربېره په کې پر تعليمي او تحصيلي بهير بحث شوی دی.
خو د اسلامي امارت ویاند ذبیح الله مجاهد په کندهار کې د يادې ناستې ترسره کېدل ردوي او وايي، د نصاب جوړولو کمېټې ته ياده سپارښتنه د رئيسالوزرا پر مشرۍ د کابينې په ۹مه غونډه کې شوې ده.
مجاهد زیاتوي: « د نصاب پر جریان بحث شوی، د دې لپاره بېلابېل کمېسیونونه ټاکل شوي، په نصاب کې مثبت بدلونونه راغلي. د کمېټو د کار پروسه واورېدل شوه، چې تراوسه څومره پرمختګ شوی او دا باید تصریح شي. همداراز ځېني نور مسایل چې د وزارتونو غوښتنې او نور موضوعات وو پر ټولو بحث وشو.»
مجاهد وايي، ټولګټو چارو وزارت ته هم دنده سپارل شوې، چې په بدخشان کې د واخان لارې سروې، ډېزاین او په اساسي توګه يې د جوړولو قرارداد په اړه هم لازم اقدامات وکړي او وروستی پلان دې يې د منظورۍ لپاره د اسلامي امارت مشرتابه ته وړاندې کړي.
د مجاهد په خبره، په دې غونډه کې پرېکړه شوې چې د افغانيو پر وړاندې د ډالر ارزښت ټيټ شوی او باید چې په بازارونو کې د خوراکي او غیر خوارکې توکو بیې هم ټیټې شي.
مجاهد زیاتوي: « تېره اوونۍ بحث کې د واخان پر سړک هم بحث وشو چې هلته اسانتیاوې نورې هم زیاتې شي، د سړک د جوړېدو کار چټک شي او پاتې برخه یې هم د ټولګټو وزارت له لوري ډيزاین او کار پرې وشي او وروستی راپور یې وړاندې شي. د دفاع او ټولګټو وزارتونو مقامونه خپله په مستقیم ډول لاس په کار دي او وخت پر وخت له کابینې سره مالومات شریک کوي. همدا راز په دې هم بحث وشو چې په هېواد کې د ارتزاقي او خوراکي توکي بیې د ډالرو له را ټیټېدو سره باید کمې شي.»
زدهکوونکې نجونې د تعليمي او تحصيلي نصاب د اصلاح بشپړولو په اړه د حکومت له پرېکړې هرکلی کوي او غوښتنه یې دا ده چې راتلونکی کال دې يې پر مخ ښوونځي او پوهنتونونه پرانېستل شي.
زدهکړیاله خالده وايي: « له اسلامي امارته هېله لرو چې د نجونو پرمخ ښوونځي او پوهنتونونه خلاص کړي ترڅو موږ زده کړې او پرمختګ وکړو.»
د سیاسي چارو کارپوهان هم د حکومت دا ګام ستایي او زياتوي، له نړۍ سره د بېرته نږدې کېدو یوازېنۍ لاره د نجونو پرمخ د ښوونځيو او پوهنتونونو د تړل شویو دروازو بېرته خلاصول دي.
د دوی په خبره، که سرپرست حکومت رېښتيا هم د رسمېت پېژندنې لپاره له نړۍ سره د تفاهم په هڅه کې وي، نو نجونو ته د زده کړو شریعي حق ورکړي.
د سیاسي چارو کارپوه نازکمیر زیارمل وايي: « پرته له شکه د رهبرۍ لېوالتیا چې څومره تعلیمي برخې پورې اړوندېږي په هماغه کچه چارواکي هم دې ته لېوالتیا ښي چې په دې چارو ژر تر ژره کار وکړي ترڅو نصاب ته یو چوکاټ جوړ کړي.»
د سیاسي چارو کارپوه محمد زلمی افغانیار وایي: « د اقتصادي برنامو د مدیریت په موخه د بدخشان واخان کوریډور هم د بحث وړ دی او کولی شي د ملت او حاکمیت ترمنځ فاصلې مدیریت کړي.»
په ټوله کې باور دا دی چې نجونې ته د زدهکړو د اجازې ورکړه هم په معنوي لحاظ او هم له سیاسي پلوه د هېواد پر ګټه ده.
د همدې باور له مخې، نجونو ته د زدهکړو له اجازې سره له یوې خوا د هېواد روښانه راتلونکی تضمینېدای او له بلې خوا د نړيوالې ټولنې هغه پلمې له منځه تللی شي، چې د رسمېت پېژندنې پر وړاندې يې مخې ته کوي.
