د کابل ښار اړوند خواجه صفا سیمې اوسېدونکي شکایت کوي چې د ژوند له ځينو اسانتیاوو بې برخې دي.
دوی د اسمايي غره پر سر اوسېږي او له همدې امله د روغتيايي خدمتونو په شمول، له ګڼو عامه خدمتونو بې برخې دي.
کابل ښاروالي په دې اړه څه نه وايي، خو د خواجه صفا اوسېدونکي ترې غواړي چې د دوی ستونزو ته دې رسېدنه وکړي.
د خواجه صفا ګذر وکيل قنداغا وايي: « سره له دې چې د لارو جوړولو لپاره مو حکومت او موسسو ته مراجعه وکړه، خو هېچا توجه ونه کړه. کله چې له لاندې بازارونو څخه توکي راوړو یا دلته کورونو کې ناروغ پيدا کېږي، انتقال یې خورا سخت دی.»
د خواجه صفا اوسېدونکی نوید وايي: « کله چې واورې او بارانونه وشي، نو دا زموږ لارې مطلق ورسره بندې شي. تاسو پوهېږئ دلته د غره په سر هوا سړه ده، زموږ د اوبو نلونه او لارې ټول یخ وهلي.»
د دې سیمې د ماشومانو ستړي ګامونه د ژوند له سختیو سره په جګړه بوخت دي. د دوی کوچیني ګامونه له غرونو درانده ښکاري، خو د مجبوریت بار يې له غرونو هم دروند دی.
دلته ژوند یوازې ماشومان نه دي ستړي کړې بلکې عمر خوړلې يې هم له سختیو سره مخ دي، د تګ راتګ او کور ته د توکو لېږدولو پرمهال له ستونزو ځورېږي.
د خواجه صفا قومي شورا مشر ګل اغا وايي: « دلته پرون شپه یوه مېرمن ناروغه وه، ته باور وکړه په ۸ تنو مو کټ کې له دې ځایه تر سړک ښکته کړه. دلته اوبه شخصي دي او په ګرانه بیه یې پلوري. که لاندې یو مترمکعب اوبه ۵۰ افغانۍ وي، موږ دلته ۹۰ افغانۍ ورکوو.»
موږ د همدې سیمې د اوسېدونکو ستونزې د کابل ښاروالۍ له مسوولانو سره شریکې کړې، خو هغوی له ژمنې سره سره بیا هم له خبرو کولو ډډه وکړه.
د کابل ښار د غرونو په سر مېشت خلک نه یوازې د ژوندي پاتې کېدو هڅې کوي بلکې د حکومت له لوري يې د غږ اورېدل کېدو تمه هم لري.
دوی وايې، په وار وار يې له اړوند ادارو سره خپلې ستونزې شریکې کړې دي، خو ورسره شوې ژمنې يوازې د کاغذونو پر مخ پاتې دي.
