د افغانستان اسلامي امارت د لوړو زده کړو وزارت کابل او پولتخنیک پوهنتونونو کې د نجونو او هلکانو د تدریس ورځې جلا کړي دي.
د دغه پرېکړې له مخې، به نجونې د شنبې، دوشنبې او چهارشنبې په ورځو او هلکان به د يکشبنې، سه شبنې او پنجشنبې په ورځو کې درسونو ته ورځي.
د لوړو زده کړو وزارت وياند احمد تقي وايي:« د دې لپاره چې اختلال په بشپړ ډول ختم شی، زده کړیالان د علمي او عملي ګروپي کارونو له پاره وخت پيدا کړي او همدا راز استادان وشي کولای، چې څېړنيز او علمي کارونه تر سره کړي، نو د کابل پوهنتون عملي شوار د پيشنهاد پر اساس د لوړو زده کړو وزارت علمي شوار پرېکړه وکړه،چې له دې وروسته به په اوونۍ کې درې ورځې هلکان او درې ورځې نجونې د درسونو لپاره ورځي.»
د کابل پوهنتون استادان او زده کړیالان بیا د لوړو زده کړو د وزارت دغه پریکړه معقوله نه بولي،خو وزارت ادعا لري،چې یاده پریکړه د علمي شورا له لوري شوې ده.
د کابل پوهنتون یو تن زده کړیال وايي:« په استادانو هم فشار راځي او په شاګردانو هم فشار راځي، مخکې چې به کوم درس ویل کېده، په محصلینو به زيات فشار نه راته، اوس چې کوم محصلین له اتو بجو تر درې بجو راځي، نو هغوی له رواني ستونزو سره مخ کیږي. اوس وخت شاګرادان فکر کوي، کوم درس چې له اتو بجو تر درې بجو ویل کیږي، دغه درسونه بيا به عملي ډول نه شي زده کولای.»
يو شمېر استادان چې نه یې غوښتل رسنیو سره خپل انځور او غږ شريک کړي، وايي د زده کړې منظم سيستم ته اړتيا ده او په يادو درې ورځو کې به زده کړیالان ونه شي کولای،خپل درسونه په بشپړ ډول ولولي.
محصلین بیا له لوړو زدکړو وزارته غواړي،چې پر دغه پریکړه له سره غور وکړي.
د کابل پوهنتون یو تن زده کړیال وايي:« دا خو د محصل په حق کې سخت ظلم دی،ځکه يو محصل باید ټوله اوونۍ پوهنتون ته راشي، درسر ولولي، او په عادي ډول درس ولولي، نه شي کیدلی، چې د دوو ورځ درس په يوه ورځ ولولي، نو پر محصل باندې فشار راځي، نو دا نه شي کیدلی. دا داسې مانا لري،چې سمستر کې دوه مياشتې درس ولولې او دوه میاشتې رخصت یې، نو هېله مو ده، چې لوړو زده کړو وزارت په دغه پرېکړه له سره غور وکړي.»
تر دې وړاندې د کابل په ګډون په ټولو ولایتونو کې هلکانو او نجونو ته مختلف وختونه ټاکل شوي ول.
د لوړو زده کړو وزارت د نوې پرېکړې له مخې به د ورځې درسي بهیر د سهار له اتو بجو پيل او د ماسپښن تر درې بجو به دوام کوي،چې په منځ کې به يې يوازې د يو ساعت له پاره دمه اخېستل کیږي.
