په تېرې یوې اونۍ کې یو سله دولس مجرمین نیول شوي، چې په بېلابېلو جرمونو کې لاس درلود.
وروسته له هغې چې په کابل ښار کې د جنايي جرمونو ګراف لوړ شو، اوس د کابل پولیس د ښار په بېلابېلو څنډو کې د مجرمینو د نیولو په لټه کې دي.
کورنیو چارو وزارت وايي، چې په تېرې یوې اونۍ کې د امنیتي ځواکونو په هڅو کې ۱۱۲ بېلابېل مجرمین نیول شوي، چې ځینې یې عدلي او قضايي ارګانونو ته معرفي شوي دي.
د کورونیو چارو وزارت د مالوماتو له مخې په کابل ښار کې د تېرو ورځو په پرتله د جنايي جرمونو ګراف ټيټ شوی او د مجرمینو د نیولو لړۍ په جدیت روانه ده.
د ولسي جرګې غړي د ښار اوسنی امنیتي وضعت نسبي ښه بولي او غوښتنه لري، چې نیول شوي کسان دې په سزا ورسول شي.
ښاریان له حکو مت څخه غواړي، چې د مجرمینو د نیول عملیات دې لنډ مهال نه وي.
د کابل ښار اوسیدونکي داسې وايي (( موږ د پولیسو له دې اقدام هرکلی کوو، خو غوښتنه مو دا ده چې دغه عملیات دې دوامداره او جاري وساتي،،،، پولیسو خو له دې مخکې هم ورته عملیات کړي مجرمین یې نیولي خو ډيری مجرمین ژر ازاد شوي دي موږ غوښتنه کوو چې نیول شوي کسان دې په سزا ورسوي.))
نیوکه داده چې امنیتي حوزو کې د نا مسلکي کسانو ګمارنه او یو شمېر امنیتي کسانو د غلو سره لاس یو کول او دنده کې ناغېړي هغه څخه دي چې د کابل ښار امنیت یې ګډوډ کړی دی.
کورنیو چارو وزارت وايي، په کابل ښار کې د جنايي جرمونو ګراف راټيټ شوی او د نورمجرمینو د نیولو لړۍ دوام لري.
