د کابل ټرافيکو رياست چارواکي په روان ۱۴۰۳ کال کې د شاوخوا ۵۴۵ ټرافيکي پېښو د ثبتولو خبر ورکوي او وايي، د يادو پېښو رامنځته کېدو عمده لاملونه د موټر چلوونکو بې احتياطي او ټرافيکي اصولو ته نه پاملرنه ده.
د دوی په خبره، د روان کال له پيل راهیسې رامنځته شویو ټرافيکي پېښو کې نږدې ۷۰۰ کسان مړه او ژوبل شوې دي.
د کابل ټرافیکو رییس خيال محمد غاور وايي: « موږ په روان کال کې ټولټال ۵۴۵ ټرافیکې پېښې لرو چې له امله یې ۲۹۷ تنه مړه شوي او ۳۸۵ تنه نور ژوبل شوي دي. د دې پېښو علتونه د پاکستان لاس موټر، د موټر چلوونکو بې احتیاطي، د موټر چلولو د جواز نه لرل او د ټرافیکي قوانینو نه رعایتول دي.»
له بلې خوا، موټر چلوونکي د ټرافيکي پېښو رامنځته کېدو لاملونه د معاري سړکونو کموالی او د لويو لارو په شمول په واټونو کې د ټرافيکي څراغونو کموالی بولي او د ټرافيکو له رياست غواړي چې يادو ستونزو ته رسېدنه وکړي.
موټرچلوونکی بريالی وايي: « حکومت ته وایم چې دا ټرافیکي نښې او اشارې ټولې خرابي دي؛ که دا جوړې شي، ټرافیکو ته به هم اړتیا نه وي او پېښې به کمې شي.»
یو بل موټرچلوونکی اېمل وايي: « خبره دا ده چې دلته اصول نه شته، هرڅوک د موټر چلولو ته ناست دی. غریبي ډېره شوې او بل کار نه شته ټولو د موټر چلولو ته مخه کړې. له هغه چلوونکي حادثه نه کېږي چې ۲۰ کاله تجربه لري، خو هغه کسان ډېرې حادثې کوي چې تازه یې موټر چلول پيل کړي.»
په ورته مهال، د کابل اوسېدونکي بيا د ټرافيکي پېښو رامنځته کېدو لاملونه بېلابېل بولي او په خبره يې د موټر چلولو اجازه لیک (لايسنس) نه لرل او د موټر چلولو پرمهال د نشه يي توکو کارول هم د دې سبب شوي چې ټرافيکې پېښې زياتې شي.
د کابل ښار اوسېدونکی اميرخان وايي: « زموږ موټرچلوونکي باید اصول رعایت کړي او له ټرافیکو هیله لرو چې د ښه چلن په کولو سره ټرافیکي قوانین پلي کړي.»
دا په داسې حال کې ده چې هر کال د موټر چلوونکو د بې احتياطۍ او د قوانينو نه مراعتولو له امله په ټول هېواد کې په کلنۍ توګه زرګونه ټرافيکي پېښې رامنځته او په پايله کې يې سلګونه کسان مړه او ژوبل کېږي.
