کابل ښاریانو د صالح له استعفا وروسته پر پولیسو نیوکې کوي.
له کورنیو چارو وزارت د امرالله صالح له استعفا وروسته یوځل بیا په کابل ښار کې وسله وال او د تورو ښیښو لرونکو موټرو تګ راتګ تر سترګو کیږي .
پر کورنیو چارو وزارت نیوکه ده چې د امرالله صالح هغه اقدامات یې تعقیب نه کړل چې د زورواکو او غیر مسولو وسله والو پر وړاندې يې پیل کړی و .
خو کورنیو چارو وزارت بیا وايي، د ولسمشر په لارښوونه د نامسولو وسله والو د مخنیوي او تورو شیشو لرونکو موټرو د راټولو کمپاین یې په جدي توګه روان دی .
شاوخوا پنځه ویشت ورځې وړاندې امرالله صالح د کورنیو چارو وزارت د سرپرست په توګه وټاکل شو او سم دستي یې د یو لړ اصلاحاتو په راوستو پيل وکړ .
د صالح د تازه اقداماتو له ډلې یوهم په کابل کې ښار کې د تورو شیشو لروونکو موټرو او غیر مسولو وسله والو مخنیوی و چې تر ډیره د خلکو هرکلي سره مخ شو خو له کورنیو چارو وزارت څخه د صالح له استعفا وروسته یو ځل بیا زور واکي زړور شوي دي.
خو کورنیو چارو وزارت مرستیال ویاند نصرت رحیمي بیا وايي د زورواکو او غیر مسولو وسله والو او تورو شیشو لرونکو موټرو د مخنیوي لړۍ په چټکۍ سره روانه ده او ډاډ ورکوي چې قانون به پر ټولو یوشان پلی کړي .
چارواکي وايي د دوی دغه اقدام له امله تر ډیره په کابل ښار کې غیر مسول وسله وال کم شوي دي چې ورسره امنیت هم ښه شوی دی .
د یکشنبې په شپه ولسمشر غني هم د کورنیو چارو وزارت ته تللی و، هلته یې د امرالله صالح هڅې ستایلي، د وزارت چارې یې د ملي امنیت سلاکار ته سپارلي او له پولیسو یې غوښتنه کړې چې هغو اصلاحاتو ته دې دوام ورکړي چې څو ورځې وړاندې پيل شوي و.
