Skip to content
د کابل ښار یو شمېر اوسېدونکي وايي،وروستيو بدلونو سره د وړو غوړيو او نورو خوراکي توکو بيې يو دم پورته شوي او په خبره یې د اخېستلو توان یې نه لري.
د کابل ښار یو تن اوسېدونکی وايي:« د افغانستان شااوخوا ۸۵ سلنه نفوس له اقتصادي ستونزو سره مخ دی. لکه څنګه،چې تېر حکومت له اقتصادي بحران سره مخ وه،اسلامي امارت هم مخ دی. موږ د اسلامي امارت له چارواکو څخه غوښتنه کوو،چې په دې برخه کې جدي ګامونه پورته کړي.»
ښاریان وايي د پلازمېنې وضعيت مخ په عادي کېدو دی، خو لوړ نرخونه پر خپل ځای پاتې او آن اوس هم د ځینو توکو بيې لوړېږي.
د کابل ښار یو تن اوسېدونکی وايي:«اسلامي امارت ویلي،چې د توکو نرخونه به مهار کړي. خو تر اوسه پورې هټیوال توکي پر لوړه بیه پلوري.د اسلامي امارت له چارواکو مو غوښتنه دا ده،چې بیې کنټرول کړي.»
د بيو د لوړوالي له کبله سوداګرو او عمده پلورونکو ته ګوته نيول کېږي،چې احتکار یې کړی خو دوی بیا وايې، له بهره توکي په ډالرو اخلي او افغانۍ د ډالرو پر وړاندې ارزښت کم کړی دی.
یو تن سوداګر وايي:« پر ډالرو مال راځي او په ډالرو پلورل کېږي. اوس په افغانانو بازار نه شته،چې خلک یې پر افغانیو خرڅ کړي. وړاندې،چې غوړي په ۱۵ سوه افغانۍ ول، اوس یې بیه ۲ زره افغانیو ته پورته شوې.»
طالبانو د نورو چارو سربېره د نرخونو د کنترول خبره کړې،خو تر اوسه پورې یې په بازار کې په دې تړاو کوم ښکاره فعاليت نه دی ليدل شوی،چې ورسره د توکو نرخونه راښکته شي.
بېوزلي او هغه کسان،چې دولتي دندې یې لرلې،په وروستيو بدلونونو کې يې معاشونه هم نه دي ترلاسه کړي،چې د لومړنيو توکو په اخېستلو کې له ستونزو سره مخ دي.
