د کابل امنیه قومانداني: چانیزو عملیاتو کې سلګونه میله وسلې ترلاسه شوي 

په کابل او یو شمیر ولایتونو کې د اسلامي امارت له لوري د کور په کور د پلټنې عملیات لاهم دوام لري.

د کابل امنیه قوماندانۍ ویاند خالد ځدراڼ وايي، په پیل شویو عملیاتو کي د کابل له بېلابېلو سیمو ګڼ شمیر وسلې، زرهي موټر او یونفرمونه  ترلاسه شوي دي. 

 د ځدراڼ په خبره،په دې عملیاتو کي یوازې د څلورمې حوزې اړوند ۴۵۰ میله وسلې ترلاسه شوي.

 ځدراڼ زیاتوي:« د کابل له بېلابېلو برخو زیاتي وسلې ترلاسه شوي دي. یوازې د څلورمې حوزې اړوند ۵۴۰ میله وسلې ترلاسه شوي دي او عملیات لاهم دوام لري.» 

ځدراڼ د هغو ادعاوو په تړاو چي ښځینه پولیسې په تلاشۍ که نشته وايي،یوازې په هغو کورونو،چې  زیات شک نه وي،ښځینه پولیسې له ځان سره نه بیايي.

هغه زیاته کړه:« موږ په هغو ساحو کې چې ښځینه پولیس نه ورځي،پرهغو کورونو باندې شک نه لرو او نه یې پلټو. کله چې صندقونه پلټو،بیا ښځینه پولیسې را غواړو.» 

د بښني نړیوال سازمان په یوه ټویټ کي ویلي، اسلامي امارت دې پیل شوي عملیات ودروي،ځکه سرتېري د خلکو کورونو ته په زور ورځي.

د بښنې نړیوال سازمان د ټویټ یوه برخه:« کابل کې د طالبانو له خوا د کورونو تلاشي باید زر تر زره  ودرول شي. راپورونه وایي،طالبان پر زور د خلکو کورونو ته ننوځي او د هغوی شخصي حریم تر پښو لاندې کوي. د کورونو او لوښو نظم ګډوډوي او کورنۍ ځوروي.» 

د کابل امنیه قوماندانۍ د بښنې نړیوال سازمان د ادعا په تړاو بیا وايي، پیل شوي عملیات د خلکو په غوښتنه دي او د نړیوالو عملیاتو په څېر نه دي،چي د خلکو پر کورونو چاپه ووهي.