افغانستان د هغو هېوادونو په سر کې دی، چې د اقلیمي بدلون او ککړې هوا له امله زیانمن شوی او لاهم زيانمنونکی دی.
د غير معياري سون توکو کارول، د نقلیه واسایطو او د کارخونې لوګی د هوا ککړتیا عمده لاملونه بلل کېږي، چې معمولا د پلازمېنې کابل په ګډون ګڼو ښارونو کې هوا د ژمې په رانږدې کېدو او يا هم د ژمي پرمهال زياته ککړېږي.
خو دا چې ژمی کرار کرار په رانږدې کېدو دی، کابل ښاریان د سون توکو بیو لوړوالي له امله شکایت کوي او زیاتوي، چې سرپرست حکومت دې د يادو توکو د بیو ټیټولو لپاره اقدام وکړي.
د کابل ښار یو تن اوسېدونکی وايي:« د ژمي لپاره هېڅ چمتوالی نه لرو، په دې خاطر چې دلته د بلوط او ارچې لرګیو خروار له ۱۲ زره تر ۱۴ زره افغانیو پورې دی. دلته دولت لرګي بند کړي او غریب خلک لرګي نه اخیستلی نه شي.»
بلخوا د سون توکو پلورونکي هم د یادو توکو د بیو لوړوالي پخلی کوي او زیاتوي، چې د تېر ژمې پرتله سږ کال يې د بيو لوړوالي له امله د کاروبار خوند نشته.
د سون توکو یو تن پلورونکی وايي:« تېر کال له سږ کال سره ډېر توپېر کوي، تېر کال د ارچې او بلوط لرګي و،هغه اوس نشته دي. اوس دا لرګي چې دي سوځي، خو ۱۰۰ سلنه نه.»
که څه هم د کابل ښاروالۍ د سون توکو د بيو په اړه واضيح څه نه وايي، خو زياتوي چې په بازارونو کې يې د توکو بيې مهار کړې او په همدې موخه يې وخت ناوخت هټۍ والو ته نرخنامې هم ورکړي.
د کابل ښاروالۍ استازی نعمت الله بارکزی وايي:« کابل ښاروالۍ له څه باندې درېیو کلونو راهیسې د لومړنیو توکو نرخونه کنټرولوي او د قانون له مخې د نرخونو کنټرول او له احتکار د مخنیوي کمېسیون نرخپاڼه صادروي او دا بیا د ښاروالۍ دنده ده، څو یوې اوونۍ کې په ښار کې د هغې تطبیق بڼه وڅاري او همدارنګه ۱۵۵ شمېره د هېوادوالو په چوپړ کې ده، نه یوازې خلک بلکې پلورونکي هم کولی شي څو خپل شکایت له دغې لارې له ښاروالۍ سره شریک کړي او ښاروالۍ به د قانون له مخې چلن وکړي.»
اخوا د چاپېریال ساتنې ملې ادارې مسوولین بیا وايي، د هوا ککړتیا د مخنوي لپاره شپږ میاشتنی پلان لري چې سږ ژمۍ به یې پلی کړی.
