د ډالرو پر وړاندې د افغانیو ارزښت ورځ تر بلې په ټيټېدو دی.
د ډالرو پر وړاندې افغانۍ په بې سارې توګه ورځ تر بلې خپل ارزښت له لاسه ورکوي.
په سیمه کې اقتصادي بدلونونه، سیاسي پیچلې وضعیت او د وارداتو او صادرتو تر منځ لوړ توپیر د افغانستان بانک د افغانینو د بې ثباتۍ لاملونه په ګوته کوي.
خصوصي سکټور پر حکومت نېوکه کوي چې د افغانۍ ثبات لپاره یې اقدامات موقتي دي او بنسټيز کار نه دی شوی.
د بهرنیو کرنسیو پر وړاندې افغانۍ تر بل هر وخت ډېر خپل ارزښت له لاسه ورکړی دی.
د افغانیو ارزښت ساتنې لپاره د مالي کال له پیل څخه ۸۵۰ ميلیونه ډالر بازار کې ليلام شوي خو سربېره پر دې افغانۍ په بې ساري توګه د ډالر پروړاندې خپل ارزښت له لاسه ورکړی دی.
په ګاونډي هېوادونو کې اقتصادي بدلونونه، په کور دننه سیاسي کړکېچونه او په ټوله کې د ملي اقتصاد خراب وضعیت د افغانستان بانک د افغانیو د بې ثباتۍ لاملونه بولي.
که څه هم د افغانستان بانک په اونۍ کې درې ځلې ډالر مارکیت کې لیلام ته وړاندې کوي، خو د افغانۍ د موقف او ارزښت ساتلو لپاره د حکومت کړنې موقتي او لنډمهاله بلل کیږي. د بهرنیو کرنسیو پر وړاندې د افغانیو د ارزښت ساتلو لپاره د لا ډېرو بنسټیزو اقداماتو سپارښتنه کیږي.
بهرنیو هېوادونو ته د ډالرو قاچاق او غیر قانوني لېږد او په کور دننه د افغانستان بانک له لوري د افغانیو غیر متوازن لیلام هغه فکټورنه بلل کيږي چې له امله یې مارکيټ کې د ډالرو تقاضا لوړيږي او په نورو کرنیسو منفي اغیزه لري.
نن د کابل د شهزداده سرای په مارکیټونو کې ډالر د افغانیو پر وړانډې په 79.15 افغانېو پېرل کېده، د ډالرو لوړیدل په بازارونو کې د خوراکي توکو او نفتي موادو په بیو هم اغیز کړی او خلک یې انديښمن کړي.
