Skip to content
په کابل کې د چین سفیر وانګ یو او پیښو ته د رسیدو په چارو کې د دولت وزارت مرستیال غلام غوث ناصري، له کابل سره د بیجینګ د اته میلیونو ډالرو په ارزښت د خوارکي توکو د تسلیمۍ سند لاسلیک کړ.
دا د هغو مرستو د تسلیمۍ تړون دی،چې په اوو پړاونو کې له وړاندې افغانستان ته رسیدلې ده.
پیښو ته د رسیدو په چارو کې د دولت وزارت مرستیال وایې،د هېواد په ۳۴ ولایتونو کې یې یاده مرسته اړمنو کسانو ته رسولې ده.
اخوا په کابل کې د چین سفیر وانګ یو بیا وایي، نږدې ورځو کې به د دوی له لورې ۲۰۰سوه ټنه نوره مرسته هم راورسیږي.
وانګ زیاته کړه:« له تیرو څو ورځو راهیسې د چین دولت چارواکي کار کوي،تر څو د افغانستان لپاره په زیاته کچه بشردوستانه مرستې چمتو کړي. تر دې دمه له ۳۲۰ ټنه زیات توکي د ۸ ملکي او پوځي الوتکو له خوا رالیږل شوي دي او ۲۰۰ ټنه نور توکې به په راتلونکو څو ورځو کې د څو چارتر شویو الوتکو په مرسته راولیږل شي.»
وانګ یو د اوسني بد وضعیت پړه د امریکا پر متحده ایالتو واچوله، چې اوکراین ته د میلیاردونو ډالرو په ارزښت وسلي ورکوي، خو د افغانانو پیسې نه ورکوي.
هغه زیاته کړه:«د تیر کال سیاسي بدلون وروسته چین زیاتې هڅې کړي دي،چې له افغانستان سره د ستونزو پر وخت مرسته وکړي او په اقتصادي برخه کې بیا رغونه وکړي. د دی بر خلاف د امریکا متحده ایالتو په افغانستان کې د افغانانو لپاره مصیبتونه راوړي او د دوی غیر مسوولانه وتلو د افغانستان لپاره ستونزې لا زیاتې کړې. د امریکا متحده ایالتو نه یوازې اوسني مصیبتونه نه مني،بلکې د افغانستان خپلې پیسې هم نه ورکوي،چي دې وضعیت لا خراب کړی دی. امریکا متحده ایالت اوکراین ته د ۴۳ میارده ډالرو په ارزښت وسلې ورکړې دي، خو هیڅ اراده نه لرې،چې د افغانانو حیاتي پیسې ورکړي.»
د مصر سرې میاشتې، ټولنې، چې تازه یې افغانستان ته مرسته راوړې، ژمنه کړې، چې مرستې به یې دوام وکړي.
د مصر د سرې میاشتې ټولنې استازی وايي:« موږ د مصر سرې میاشتې ټولنې څخه راغلی یو. دلته د افغاني سرې میاشتې ټولنې سره ګورو. موږ دلته د ملاتړ لپاره یو، د مصر سرې میاشتې ټولنې د کارکوونکو او رضاکارانو له خوا مو همدا پیغام راوړی دی. موږ دلته ګډ کار همغږی کوو،مرسته مو وکړه او تېره ورځ مو ووېشله. دا لومړی ګام دی او موږ به مرستې او ملاتړ ته دوام ورکړو.»
افغانستان کې له وروستیو زلزله ځپلو سره په میلیونونه ډالر مرستې اعلان شوې، خو لاهم په سیمه کې اغیز هغه ډول چې په کار دی نه لیدل کیږي،د ځایي خلکو په وینا،چې ځینې سیمې چې زلزلې ځپلي، آن خلک ترې خبر نه لري او نه هم مرستې ورسیدلي دي.
