مریخ ته د چین د ټیانوېن ون ماموریت مشر ډیزاینر ژانګ رونګ وايي، دا ماموریت به د نورو سیارو څېړل او سپړنو له پاره هم لاره هواره کړي.
په ورته وخت کې رونګ وايي،د دې ماموریت وسایل تر اوسه پورې په ښه حالت کې دي.
د ژانګ په خبره، ټیانوېن ون ماموریت د سپوږمۍ او ځمکې له سېستم بهر د چین لومړی ګام دی او هېواد به یې هڅه وکړي،چې ژوره فضاء په ښه ډول وسپړي.
چین دا ماموریت د تېر کال په جولای میاشت کې پیل کړی وو،چې د سږ کال د می میاشتې په نیمایي کې یې وسایل د مریخ شمالي نیمه کره کې د اوتوپیا پلانېشیا سیمه کې ښکته شول.
د یاد ماموریت د ژورونګ موټرګي د ژوند دوره د مریخ ۹۰ ورځې، چې د ځمکې نږدې درې میاشتې کېږي اټکل شوې او په دې وخت کې به د مریخ له سطحې د لوړې کچې ویډیوګانې ریکارډ، انځورونه واخلي، د سطحې د جوړښت توکي به تحلیل کړي، د سطحې لاندې جوړښت به تحلیل کړي، مقناطیسي ساحه به وارزوي او د اوبو د څرک په اړه به هم هڅې وکړي.
