د اطلاعاتو او کلتور وزارت د زندانونو چارو سمون له ادارې سره په همغږۍ د مطالعې اوونۍ په مناسبت په څرخي پله زندان کې د کتاب دوه ورځنی نندارتون پیل کړ.
د دغه وزارت مسوولین د نندارتون اصلي موخه د مطالعې دودول یادوي او په خبره یې په ۱۸ بېلابېلو سایزونو کې یې تر دې دمه ۱۶ زره قرانکریم چاپ کړي او ۲۲ زره نور به په نږدې راتلونکي کې چاپ شي.
د بیهقي ریاست د قرانکریم د چاپ او نشرولو امرعزت الله عابد وايي: « امتونه کولی شي چې د مطالعې په وسیله خپل ژوند روښانه او د نېکمرغۍ او خوشبختۍ مقامونو ته ورسېږي، چې تر دې دمه ۱۲ ډوله کابو ۱۶ زره ټوکه چاپ او بازار ته ارزه شوې دي او ۲۲زره نور په بېلابېلو سایزونو کې تر چاپ لاندې دي چې دا د اسلامي امارت یوه ستره معنوي لاسته راوړنه ده.»
مسوولین ادعا کوي، چې د ځیرکو مبایلونو د کارولو په شمول د بېلابېلو عواملو له امله پر مطالعې سربېره ان له زدهکړو سره علاقه کمه شوې او له خلکو غواړي، چې د خپلو ماشومانو پر روزنه څار وکړي.
دوی وایي، د پخوا پرتله زندانونه د زده کړو پر مرکزونو بدل شوي او ډاډ ورکوي، چې زندانیان له هر ډول شکنجو په امن کې دي.
د زندانونو چارو سمون ادارې نظامي مرستیال حبیب الله بدر وايي: « د افغانستان په ټولو زندانونو کې به یې الحمدالله څوک ثابته نه کړي چې په چا ظلم شوی وي، څوک په تکلیف شوی وي او یا چاته روحي زیان رسول شوی وي. په اکثرو زندانونو کې مو دغه د زندان مجاهدین ملګري دي چې له ډلې یې یو هم زه یم چې په دغو زندانونو کې مې کلونه کلونه تېر کړي.»
د زندانونو چارو د سمون ادارې د ښوونې او بیا روزنې مشر عبدالوارث سادات وايي: « له بده مرغه دغه غضب پیدا شو، دا موبایلونه، ګټه به هم لري ځکه چې ډېرې اړتیاوې پوره کوي؛ خو زیانونه یې له حده زیات دي. زموږ کشره طبقه یې در به دره، تباه او برباد کړه، له زده کړو او مطالعې یې وېستي. مدرسه کې به هم هڅه کوي چې وخت ځانته پیدا کړي او موبایل وکاروي، که په کور کې وي هم به دا غضب ورسره وي او ډېر ښه ښه خلک په دې عذاب اخته دي.»
بل لور ته د دفاع وزارت مسوولین د زندانیانو لپاره د مطالعې دا اقدام غوره فرصت بولي او له زندانیانو غواړي، چې د مطالعې، حرفوي زدهکړو او په نورو برخو کې د شته امکاناتو پر مټ مسلک زده کړي څو په راتلونکي کې د خپلې کورنۍ اقتصادي اړتیاوې پرې پوره کړي.
د ملي دفاع وزارت سرمفتش لطف الله حکیمي وايي: « د زندان او زندانیانو لپاره به ښه فرصت دا وي چې له زندانه مدرسه جوړه کړي، اوس دوی ته د مدرسې جوړولو بهترین چانس دی، کتابونه به ورته راوړي، ډوډۍ ورته رسوي، امنیت یې خوندي دی. وهل، ټکول او شکنجې نشته.»
د اطلاعاتو او کلتور وزارت د بیهقي کتاب خپرولو ریاست له لوري د مطالعې دود به موخه د دې نندارتون لومړۍ دوه ورځې یکشنبه او دوشنبه نندارتون په کابل پوهنتون کې جوړ شوی و، دوه ورځې سه شنبه او چهار شنبه يې په څرخي پله زندان کې او پاتې ورځې به په مرکزي دارالیتام کې ترسره کېږي.
