راتلونکو ټاکنو کې له بایومتریک نه د ګټې اخیستنې بنه بدله او سخته شوې.
ټاکنو کمېسیون نن د احصايې له مرکزي ادارې، سیاسيونو او ولسمشرۍ نوماندانو سره خبرې کړې او په نوي ډول سلا شوي.
له دې سره په ټاکنو د څار بنسټونه په نوي ډول نیوکې لري او غوښتنه لري چې داسې سیستم جوړ کړي چې په کم وخت کې شفاف کار وکړي.
ټاکنو کمېسیون د راتلونکو څلور واړه ټاکنو لپاره پلان لري چې بشپړه بایومتریک پروسه مخته یوسي.
بایومتریک نه په تېرو پارلماني ټاکنو کې هم کار اخیستل شوی، خو هغه کې ستونزې وې، ټاکنو کمېسیون دا ځل ټاکنو لپاره له نورو سره هم مشورې کړې چې په نوي ډول بایومتریک وکاروي.
له نوي ډول سره به د رای ورکوونکي لس واړه ګوتې بایومتریک کېږي، عکس به یې اخیستل کېږي او په تذکره به یې ځانګړی سټېکر لګول کېږي.
په ټاکنو د څار بنسټونه له ټاکنو کمېسیون غواړي چې داسې سیستم جوړ کړي چې ټولو ته د منلو وي او کم وخت کې ډېر کار وکړي، خو اوسنی سیستم د وخت له پلوه ښه نه بولي.
له دې سره ټاکنو کمېسیون د راتلونکو ټاکنو لپاره زماني مهالویش او عملیاتي پلان جوړ کړی. کمېسیون باوري دی چې له تېر یې تجربه اخیستې او داسې پلان یې جوړ کړی چې له خنډونو سره مخ نه شي.
تېرو پارلماني ټاکنو کې له بایومتریک سم کار وانه اخیستل شو او له یو میلیون ډېرو رای ورکوونکو له بایومتریک پرته رایه وکاروله. شکایتونو کمېسیون ته د تېر بایومتریک په تړاو شکایتونه شوي او دا ځل تمه لري چې له سم سیستم کار واخلي.
