د ملي شورا ګډې کمیټې هغه طرحه د رایو په اکثریت سره تایید کړه چې له مخې به یې افغان حکومت د پیسو له نړیوال صندق څخه د ګټې له ورکړې پرته ۲۲۹ ملیونه ډالره پور واخلي.
په پارلماني چارو کې د دولت وزارت د پور اخیستنې دا وړاندیز مهم بللی او وایي، ګډ کمیسیون ددغه وړاندیز په تایید کولو سره یو مهم ګام واخیست او د دولت د ټاکل شویو ملي موخو په ترلاسه کولو کې یې خپل ملي سهم ادا کړ.
په پارلماني چارو کې د دولت د وزارت په وینا، دا قرضه په هیڅ ډول ټیکټانه نه لري او که چیرته د افغانستان اسلامي جمهوري دولت په راتلونکو لسو کلونو کې یاده قرضه د اقتصادي ستونزو له امله اداء نه کړي نو ۲۰٪ ورته بښل کېږي.
دغه طرحه څه موده وړاندې ولسي جرګې ته ورغلې وه خو د وکیلانو له مخالفت وروسته رد شوې وه، مشرانو جرګې بیا هماغه مهال تایید کړه.
د قانون له مخې، هغه مسایل چې په ملي شورا کې دیوې جرګې له لوري رد او بله یې تایید کړي د دغه اختلاف د حل لپاره د دواړو جرګو ګډ کمیسیون ټاکل کیږي.
اوس له د پیسو له نړیوال صندق نه د پور دغه طرحه دولسي جرګې او مشرانو جرګې په ګډ کمیسیون کې تایید شوه چې حکومت دې له ۲۲۹ ملیونه ډالره چې ۱۷ ملیارده افغانۍ کیږي له یاد صندق په پور واخلي.
افغان حکومت دغه پور پيسې له کرونا سره د مبارزې په موخه د پیسو له نړیوال صندق غوښتي.
