Skip to content
په سوېل کې د پکتیکا ولایت په ګیان ، زیړوک او برمل ولسوالیو زلزله ځپلې یو شمېر کورنۍ تر اوسه پورې له سرپناه پرته تر شنه اسمان لاندې ژوند کوي.
دوی وايي،سرپناه نه لري او د افغانستان له اسلامي امارته او مرستندویه بنسټونه غواړي،چې مرسته وسره وکړي.
د پکتیکا زیړوک ولسوالۍ یو تن اوسېدونکی وايي:« د سرپناه ځای نه لرو. موږ هم انسانان یو، غوښتنه مو دا ده،چې خیمې راکړل شي او یا هم راته د سرپناه لپاره ځای جوړ شي. له اسلامي امارته مو غوښتنه دا ده،چې له موږ سره مرسته وکړي.»
زلزله ځپلو سیمو کې خلک د اسلامي امارت او مرستندویه بنسټونو مرستو ته نه دي په تمه شوي ، له خپلو شته امکاناتو ګټه پورته کوي او د سړک جوړولو په څیر ګڼ کارونه په اشر ترسره کوي.
د ګیان ولسوالۍ یو تن اوسېدونکی وايي:« سړکونه مو ویجاړ شوي دي. ژمی راروان دی. موږ په اشر باندی اوس دغه یو څه جوړ کړ.»
د پکتیکا اطلاعاتو او کولتور ریاست مشر محمد امین حذیفه بیا وايي، د مرستو ویش لپاره ځانګړې کمیټه جوړه شوې او ټولو زلزله ځپلو ته په پوره روڼتیا مرستې ویشل کیږي.
هغه زیاته کړه:« د کمېټې په همغږۍ سره سروې کېږي، مرستې هرچاته په اندازه سره د اسلامي امارت د کمېټې له لورې وېشل کېږي. هېڅ داسې ستونزه نه شته ده،چې څوک ووایي،چې مرستې نه دي رارسېدلي.ټولو ته مرستې رسېدلي دي.»
د اطلاعاتو او کولتور ریاست له نړیوالو مرستندویه بنسټونو غواړي،چې د ژمې له را رسیدو مخکې دې د زلزله ځپلو لپاره د سرپناه په برخه کې مرسته وکړي.
