د پکتیکا ولایت په ګیان ولسوالۍ کې بیا زلزله شوې 

د پکتیکا ولایت ځايي مسولین وايي،د دغه  ولایت په ګیان او زیړوک ولسوالیو کې له تیرې ورځې راهیسې نږدې ۳۰ ځلې زلزله شوې ده.

ځايي خلک وايي، یوازې له نن سهاره تر دې دمه یاد ولسوالیو کې ۴ ځله زلزله شوې ده. 

په دغه زلزله کې لسګونه بابه کورونه هم زیانمن او یا بشپړ نړیدلي دي.

د یاد ولایت داطلاعاتو او فرهنګ ریاست مشر محمد امین حذیفه وايي، پرون شپه د زلزلې له امله یو شمیر کورونه ویجاړ شوي او دښځو او ماشومانو په ګډون لسګونه کسان ټپيان شوي دي.

دغه راز حذیفه وايي، په ګیان ولسوالۍ کې د ماشومانو او ښځو په ګډون ۱۳ تنه او په زیړوک کې ۱۸ تنه ټپيان شوي او روغتون ته لېږدول شوي دي.

دغه راز ځايي مسوولین وايي، د ګیان ولسوالۍ په ږلۍ کلي کې له زلزلې سره هم مهاله له ځمکې ویرونکي غږونه اورېدل شوي. 

د مسولینو پر وینا، د سیمې خلک د یادو غږونو په اورېدو سره سخت  اندېښمن شوي دي. 

د ږلۍ کلي اوسیدونکو  له مرکزي حکومته یې غوښتي دي،چې ګیان ولسوالۍ ته جیولوجیکي ټیم ولېږي.

اخوا د افغانستان اسلامي امارت د رئیس  الوزرا مرستیال ملا عبدالغني برادر پکتیکا او خوست ولایتونو کې د زلزلې له امله پر اوښتو زیانونو خواشیني ښودلې او د اړونده ادارو مسوولینو ته یې امر کړی دی،چې له شته امکاناتو په استفادې دې زلزله ځپلو ته رسېدنه وکړي .

دا په داسې حال کې ده، چې د غبرګولې پر ۳۱مه نېټه د رېښتر پر کچه ۶،۱ درجې زلزلې د پکتیکا ولایت په ګیان ولسوالۍ او شااوخوا سیمو کې له زرو زیات کسان مړه او سلګونه نور یې ژوبل کړل.