په سویل کې د پکتیا ولایت پوهنې ریاست مرستیال حبیب الله عمریار وایي،ښوونځیو کې ۲۵۰۰ ښوونکو ته اړتیا لري او دغه تشه یې د اړتیا له مخې تر ډېره په افتخاري ښوونکو ډکه کړې ده
عمریار وایي،وزارت ورسره د ښوونکو د تشکیل زیاتوالي ژمنه کړې او دا مهال یې ۵۰۰ بستونه چې ښوونکي او نور کارکوونکي په کې شامل دي، اعلان ته سپارلي.
عمر زیاته کړه:« ۲ زره ا و ۵۰۰ ښوونکو ته اړتیا لرو، بلکې جدي اړتیا لرو. دا موږ ته د وزارت له لوري منظور شي او اوس مو ۵۰۵ بستونه اعلان ته ورکړي،چې د ښوونکو او نورو کارکوونکو دي.»
ښوونځیو کې د ښوونکو د کموالي تر څنګ د کتابونو نه موجودیت د زده کړو بهیر ټکنی کړی او زده کوونکي وایي، کتابونه دې ورکړل شي او بازارونو کې یې د اخېستلو توان نه لري .
د ښوونځي یو تن زده کوونکی وايي:« موږ له اول ټوولګي تر ۱۲ ټوولګي، هیڅ ډول کتابونه نه لرو. د ښوونکو کموالي سره هم مخ یو. موږ په ټوولګي کې۴۰ کسان یو،چې دوه یا درې کسان یې کتابونه لري.»
د ښوونځي یو بل زده کوونکی بیا وايي:«موږ غواړو،چې راسره د کتابونو مرسته وشي،د خلکو اقتصادي وضعیت بیخي خراب دی. کتابونه بیخي کم دي او کوم چې شته دي،بیخي زاړه دي او د لوستلو نه دي.»
خو د پوهنې ریاست مرستیال حبیب الله عمریار بیا وایي، وزارت ورسره د کتابونو د لیږلو ژمنه کړې او له ښوونځیو یې اضافي کتابونه را ټول کړي،ترڅو هغو ښوونځیو کې زده کوونکو ته ورکړل شي،چې هېڅ کتابونه نه لري.
عمریار زیاته کړه:« موږ له وزارت سره دا ستونزه شریکه کړې او هغوی یې د هواري ډاډ راکړی دی. انشاالله دا ستونزه به حل شي او بل دا،چې موږ له ښوونځیو اضافي کتابونه را ټول کړي او په هغو ښوونځیو کې یې زده کوونکو ته ورکوو،چې هېڅ کتابونه نه لري.»
د ښوونکو او کتابونو د کموالي تر څنګ پکتیا کې شااوخوا ۶۰ سلنه ښوونځي ودانۍ نه لري او زده کوونکي یې له سرپنا پرته زده کړې کوي.
