د پکتیا میرزکې ولسوالي پرون شپه د طالبانو لاس ته لوېدلې او امنیتي ځواکونو سیدکرم ته شاتګ کړی دی.
ولایتي شورا وایي، یاده ولسوالي له مقاومت پرته طالبانو پرښودل شوې ده .
د پکتیا ولایتي شورا غړی جنت خان څمکنی وايي: « رېښتا هم پرون شپه شااوخوا ۱۲ بجې د میرزکې ولسوالي طالبانو نیولې ده. ولسوالۍ بې له جګړې پرېښودل شوې. دا زموږ خپلمنځي نا همغږي ثابتوي، چې ښايي نورې ولسوالۍ هم له لاسه ورکړو.»
بل پلو د میرزاکې ولسوالۍ اوسېدونکي طالبانو ته د ولسوالۍ پرېښودل قصدي عمل بولي او وایي، دا ولسوالۍ له مقاومت پرته طالبانو ته سپارل شوې ده .
د میرزکې اوسېدونکی وايي: « له ولایته ورسره مرسته ونه شوه. همدا لامل وو، چې هغوی له مجبوریته ورته ولسوالۍ پرېښودله.»
د میرزکې تر څنګ لجه منګل ، احمدخیل او اریوب ځاځیو ولسوالۍ له تېرو دوو اونیو راهیسې کلابندې دي.
د ولایتي شورا مشر عبدالمالک ځاځی وایي، که پر وخت ورته اکمالات ونه شي، دری واړه ولسوالۍ به د طالبانو لاسته ورشي.
ځاځي زیاته کړه: « اوس د لجه منګل، احمد خېل او اریوب ځایونو ولسوالیو ته سور څراغ دی. که پر وخت ورته تدابېر ورته ونه نېول شي، ښايي دا ولسوالۍ هم د طالبانو لاسته ورشي.»
امنیتي چارواکي په دې اړه څه نه وايي، خو طالبانو رسنیو ته په لېږل شوې خبرپاڼه کې ویلي، میرزاکې ولسوالۍ یې پرون شپه په بشپړ ډول نیولې ده.
