د پکتیا لجې منګل اوسېدونکي د سړک نه شتون له امله ستونزو سره مخ دي 

په سویل کې د پکتیا ولایت لجې منګل ولسوالۍ  درې  اوسېدونکي وايي،د سړک نه موجودیت له امله یې ناروغان پر وخت روغتیایي مرکزونو ته نه رسیږي، لاره کې ساه ورکوي او خوړ کې د اوبو له ډېریدو سره یې درې ته تګ راتګ ناشوني وي. 

دوی وایي،مخکېني حکومت کې یې څو ځله د سړک سروې ترسره شوې،خو عملي کار پرې نه دی شوی. 

د لجې منګل ولسوالۍ اوسېدونکي  وايي:« ژمي کې واورې او پسرلي او اوړي کې خوړ کې اوبه ډیرې وي، ناروغان پر وخت روغتونونو ته نه رسیږي. یو موټر په څلور زره افغانۍ ځي،خلک غریب دي،زر افغانۍ هم څوک نه نه لري.» 

د لجې منګل ولسوالۍ  یو بل اوسېدونکی بیا وايي:«مخکیني حکومت کې څو ځله د سړک سروې شوې، خو عملي کار نه دی شوی اوس له اسلامي امارت غواړو چې دغه سرک دې مونږ ته جوړ کړي که پوخ نه چې په خام ډول خو جوړ شي.» 

دوی همدا راز وایي، د اوبو د ډېریدو پر وخت خلک ناروعان، په اوښانو،اسانو او بار وړونکو موټرو کې انتقالوي او په څو پیښو کې یو شمیر کسان اوبو وړي دي. 

د لجې منګل ولسوالۍ اوسېدونکی وايي:« ټوله دره کې زرګونه کورنۍ اوسیږي. دا سړک په خوړ کې دی،کله چې باران کیږي ، سېلابونه راووځي، په څو پیښو یې کې یو شمیر کسان اوبو وړي دي.»

د لجې منګل  ولسوالۍ یو بل اوسېدونکی بیا وايي:« ۲۵ کیلو متره لاره ده. ټول مزل په خوړ کې کوو.اوس خو وچکالي ده، پسرلي کې خلک په اوښانو، اسانو او بار وړونکو موټرو کې  تګ راتګ کوي.» 

د پکتیا اطلاعاتو کولتور مشر خالقیار احمدزی  وايي، ټوولګټو چارو ریاست له اړوند وزارت سره د لجې منګل درې سړک ستونزه شریکه کړې او د هواري ډاډ یې ورکړل شوی.

احمدزي زیاته کړه:« د لجې منګل ولسوالۍ د اوسېدونکو د سړک په اړه به ووایم چې ټوولګټو چارو ریاست له اړوند وزارت سره یاده ستونزه شریکه کړې او ډ هواري ډاډ ورکړل شوی.»

خالقیار احمدزی همدار راز وایي، ټوولګټو چارو وزارت له بسپنه ورکوونو بنسټونو سره د لجې منګل درې د سړک ستونزه شریکه کړې او هڅه دا ده ،چې بودیجه ورته پیدا او  سړک جوړ شي.