Skip to content
په سویل کې د پکتیا ولایت جاني خېلو ولسوالۍ کوټکي سیمه کې شااوخوا ۸۰۰ کورنۍ ژوند کوي او وایي، د ژوند له بېلابېلو اسانتیاوو بې برخې دي.
دغه سیمه تیرو کلونو کې د اسلامي امارت تر واک لاندې وه او هېڅ ډول روغتیايي او مخابراتي اسانتیاوې په کې نه شته دی.
د کوټکي سیمې اوسېدونکي وايي، تیرو ۲۰ کلونو ورته د روغتیا ، پوهنې او بیارغونې بېلابېلو برخو کې کار نه دی شوی او له کبله یې دوی د ژوند له لومړنیو اسانتاوو بې برخې دي .
کوټکي سیمې یو تن اوسېدونکی وايي:« تقریبا زموږ ټول کلي کې ۸۰۰ کورنۍ ژوند کوي. ۸۰۰ کورنۍ یو روغتیايي کلینیک نه لري. عموما د جاني خېلو ولسوالۍ د پکتیا پر سطحه ډېره وروسته پاتې ده او بیا وروسته زموږ دغه کلی دی.»
د کوټکي سیمې یو بل اوسېدونکی بیا وايي:« خلک بې وزله دي.ولسوالۍ پورې موټر ۱۰۰۰ افغانۍ اخلي. د چا وس ورته نه رسېږي.»
د جاني خیلو کوټکي اوسیدونکي همدا راز وایي، تیرو کلونو کې د پوهنې او بیا رغونې برخو کې ورته پام نه دی شوی او اسلامي امارت دې ورته پاملرنه وکړي .
د کوټکي سیمې اوسېدونکی وايي:« جاني خېلو ولسوالۍ پورې تقریبا دوه ساعت پیاده لاره ده او د موټر بیا نیم ساعت لاره ده. بیا به له هغه ځایه خپلو خپلوانو او هغه چا سره یې چې کار وي، زنګ وهي. »
د پکتیا اطلاعاتو او کولتور مشر خالقیار احمدزی د کوټکي سیمې اوسیدونکو شته ستونزې مني او وایي، اسلامي امارت یې هواري ته ژمن دی.
احمدزی زیاتوي، نږدې راتونکي کې به یاده سیمه کې یو روغتیایي مرکز جوړ شي.
هغه زیاته کړه:« د روغتیا په برخه کې کومه ستونزه،چې دوی یاده کړې، انشاء الله د پکتیا ولایت روغتیا ریاست د وزارت او ولایت مقام پر لارښوونه، به نږدې راتلوونکې کې پلان کې ده،چې یو نوی کلینیک جوړ شي. »
د کوټکي او په ټولییز ډول د جاني خیلو ولسوالۍ اوسېدونکو ستره غوښتنه د سړک جوړیدل دي او وايي، ډېری وخت یې بېرني ناروغان پر وخت د څمکنیو روغتون ته نه رسیږي او لاره کې ساه ورکوي.
