د پاکستان حکومت د تېرې یک شنبې په ورځ رسماً د پښتون ژغورنې غورځنګ پر فعالیتونو بندیز ولګاوه او په دې توګه یې د اکټوبر په ۱۱مه د پښتونو قامي جرګې د ترسره کېدو د مخنیوي هڅه وکړه.
په تازه اقدام کې د دې هېوا پوځ تېره شپه په خیبر دره کې د جرګې په میدان کې پر ګډونوالو او راغلو قافیلو وسله وال برید کړی چې په پایله کې یې د پښتون ژغورنې غورځنګ (پي.ټي.اېم) د غړیو ترڅنګ د جرګې یو شمېر ګډونوال هم سخت ټپیان شوي.
پاکستاني پولیسو د خلکو د خپرولو په موخه د ډزو ترڅنګ پر خلکو اوښکې بهوونکی ګاز هم کارولی.
د دې ترڅنګ، د پاکستان امنیتي ځواکونو له سویلي وزیرستان څخه جرګې ته پر راتلونکي ولسي کاروان هم ډزې کړې او جرګې ته د ورتلونکو لارو پر سر يې د خنډونو له اېښودلو سره په جرګه کې د خلکو له ګډون کولو مخنیوی کړی.
د پي.ټي.اېم غړي د سوله ییزې حق غوښتنې پر وړاندې د پاکستاني پوځ تاوتریخجن چلن، د جرګې بریالیتوب او د پوځ ماتې بولي او په خواله رسنیو کې یې «پر خیبر ننګ وکړئ» هشتګ کارولی.
د پښتون ژغورنې غورځنګ مرکزي غړی نور باچا وايي: « په دې کې هېڅ شک نه شته چې پنجابي ریاست ماتې خوړلې. د وسلې کارول او د داسې شرمناکو کارونو ترسره کول د ماتې مانا لري. زموږ مقاومت او لا په میدان درېدل د فتحې نوم دی، موږ فتحه حاصله کړې او له اخلاقي پلوه مو ماتې ورکړې.»
د سې شنبې پر شپه هم زیات شمېر پاکستاني پولیسو د جرګې پر ځای برید کړی او پر راټول شویو خلکو یې ډزې کړي، ګڼ شمېر یې له ځان سره وړي او د ماشینرۍ په کارولو سره یې د جرګې میدان کې د خندقونه په کېندلو سره د جرګې ګډوډولو هڅه کړې.
د پي.ټي.اېم مشر منظور احمد پښتین د پاکستاني حکومت ورته اقدام د جرګې له جوړېدو او په کې د ترسره کېدونکو پرېکړو څخه د دوی هغه وېره ګڼي چې په وینا یې ورسره له لسیزو راهیسې د پښتون ولس پر سر او مال د پاکستان پوځ روانې کړې لوبې ته د پای ټکی کېښول کیږي.
پښتین په دې اړه وايي: « د پښتنو د ملي جرګې په خیبر ګراونډ باندې د پاکستاني زورورو چارواکو قبضه ده. د غټې ماشینرۍ په وسیله د پښتنو ملي جرګې ډګر کې خندقونه کېندي. په پاکستان کې د پښتنو دا حثیت دی چې په خپلو زرګونو کالونو آبادو کليو او علاقو کې هم د خپلو روایاتو مطابق د یوې جرګې اجازه هم ریاست نه ورکوي. په دې جرګه کې ریاست د پښتنو په وینې او معدنیاتو د دوی روان کاروبار ته زیان ویني؛ ځکه یې په پي.ټي.اېم او جرګه بندیز ولګاو.»
د پښتون ژغورنې غورځنګ د مرکزي کمېټې غړی حاجي صمد وايي: « د پاکستان پولیس او نور امنیتي ځواکونه د شپې راغلل او هڅه یې وکړه چې د جرګې جوړېدو مخه ونیسي. زه ورته وایم چې دا جرګه ده، احتجاج نه دی او نه هم کومه سیاسي غونډه ده. دا زموږ د پلرونو او نیکونو دود دی او خامخا به ترسره کېږي.»
د پښتون ژوغورنې غورځنګ مشر منظور احمد پښتین وايي، پاکستاني ریاست تر دې وړاندې هم د پېښور روغتونونو، بېړنیو څانګو ته له دې کبله د «تیارسئ» امر کړی چې پر خلکو له برید وروسته د احتمالي مرګ ژوبلې قربانیان هلته ولېږدوي.
نوموړي له دې هرڅه سربېره په ټاکلې نېټه د جرګې د ترسره کېدو ډاډ ورکړی او ټینګار کوي چې د جرګې جوړول لا اړین او حیاتي دي.
بل پلو، د بښنې نړیوال سازمان هم د پاکستاني حکومت له لوري پر پي.ټي.اېم د لګول شويو بندیزونو د ژر تر ژره لرې کولو غږ کړی.
یاد سازمان په دې تړاو غبرګون کې د پښتون ژغورنې غورځنګ د سوله ییزو احتجاجونو پر وړاندې زور زیاتی او د غورځنګ د غړیو خپل سري نیونې او هدف ګرځول، له واکه ناوړه ګټه اخیستنه او د قانون ناسمه کارونه بللې.
دغه سازمان زیاته کړې: « د پاکستان حکومت باید په سملاسي توګه خپل چلن\ سم کړي او د سوله ییزو لاریونونو او ناستو جرمي کولو ته دې د پای ټکی کېږدي. حکومت باید د قومیت له مخې د مخالفو ډلو ټپلو څارل ودروي او له پي.ټي.اېم سره د ترهګرۍ ضد ورته عمل کولو پر پرېکړې له سره غور وکړي.»
د سیاسي چارو شنونکی معین ګل څمکنی په دې اړه وايي: «له پاکستان څخه هیله کوو چې د جرګې په تړاو له تشدد څخه کار وا نخلي او اجازه ورکړي چې جرګه په خوندي فضا کې ترسره شي.»
د پښتنو قامي جرګې جوړېدو پر وړاندې د پاکستان حکومت دغه اقدامات داسې مهال دي چې وړمه ورځ د پاکستاني طالبانو تحریک (ټي.ټي.پي) د پښتنو جرګې ته د درناوي لپاره له پاکستاني پوځ سره پنځه ورځنی اوربند اعلان کړ.
د ټي.ټي.پي دغه اقدام په یو ډول د جرګې د ملاتړ اعلان او ترڅنګ یې د غوره ترسراوي لپاره د امنیتي ګواښونو د کچې راټیټېدل یاد شوي دي.
