یو شمېر افغان سیاسي او رسنیزو فعالانو او د پوهنتون استادانو کابل کې د ملګروملتونو سیاسي استازولۍ(یوناما) دفتر مخې ته هغه اعتراض لیک لاسلیک کړ چې په کې پر افغانستان د پاکستان پوځي رژیم پر بریدونو اعتراض او غندنه شوې.
دغه اعتراض لیک چې په کابل کې د ملګرو ملتونو استازولۍ ته وسپارل شو، په کې د ياد سازمان له امنیت شورا، د بشري حقونو له نړیوالو مدافع بسټونو او همدا راز جنګي جرمو د څېړنې له نړیوالې محکمې غوښتل شوي چې پر افغانستان د پاکستان بریدونه چې تر ډېره عام افغانان او ملکي تاسیسات او کورونه په کې په نښه کېږي، وغندي او په جدي توګه یې د جنګي جرایمو په توګه وڅېړي.
د سیاسي چارو شنونکی روح الله هوتک وايي: « په افغانستان کې د ملګرو ملتونو پر استازولۍ(یوناما)، د ملګرو ملتونو پر امنیت شورا، د بشري حقونو پر مدافع بنسټونو، د جنګي جنایتونو څېړنې پر نړیوالې محکمې، د اسلامي همکاریو پر سازمان او پر هغو نورو نړیوالو سازمانونو چې په دې برخه کې فعالیت کوي، غږ کوو چې پر افغانستان د پاکستان تېری او تجاوز وغندي. دغه تېری چې د بشري او جګړه ییزو قوانینو او اړوند کنوانسیونونو له مخې جنګي جنایت بلل کېږي، باید هر اړخیزه څېړنه یې وکړي. باید د دې بریدونو ترسره کوونکي د جنګي جرمونو نړیوالې محکمې د قوانینو پر بنسټ محاکمه او شدیدا ً مجازات کړي.»
د سیاسي او مطبوعاتي فعالانو په دې اعتراض لیک کې له نړیوالې ټولنې غوښتل شوي چې په افغانستان کې د پاکستان پوځي رژیم د جنګي جنایتونو مخه ونیسي او عاملان یې چې په سر کې یې د پاکستاني پوځ لوی درستیز عاصم منیر دی، باید نړیوالې محکمې ته معرفي او مجازات کړي.
روح الله هوتک په دې اړه وايي: « د پاکستان له خوا دې په راتلونکي کې د هر ډول نظامي اقدام او پارونکي عمل مخه په جدي ډول ونیول شي. همدارنګه د ملګرو ملتونو منشور د ۲۴ مادې پر بنسټ دې د افغانستان ملي حاکمیت او ارضي تمامیت په ټوله معنا احترام وشي. د پاکستان پوځي مشر عاصم منیر او ښکېله پوځي کړۍ دې په افغانستان کې ترسره کړیو جنګي جنایتونو پر بنسټ د جرمنو نړیوالې محکمې ته ور وپېژندل شي. د پاکستان پوځي مشر او ښکېله کړۍ دې د سیمه ییز او نړیوال امنیت او ثبات د کډوډولو په موخه شدیدا ً مجازات شي. د پاکستان پوځي رژیم دې په هوايي بریدونو کې د شهید شویو او ټپیانو کورنیو ته جنګي غرامت ورکړي.»
اعتراض کوونکي په کابل کې د ملګرو ملتونو له سیاسي استازولۍ غواړي چې د دوی اعتراض لیک جدي وګڼي او د ملګرو ملتونو امنیت شورا، د بشري حقونو تر نړیوالو مدافع بنسټونو او همدا راز د جنګي جرایمو د څېړلو پر نړیوالې محکمې سربېره یې د اسلامي همکاریو تر سازمان هم ورسوي.
د سیاسي چارو شنونکی یوسف امین ځاځی وايي: « که ملګري ملتونو واقعا ً خپلواک وي، په انساني او بشري ارزښتونو ولاړ وي، زموږ پیغام باید د نړیوالې ټولنې پر مېز کېږدي.»
د پوهنتون استاد جاوېد مومند وايي: « دا کوم پرېکړه لیک چې دلته ولوستل شو، موږ پرې ټینګار کوو او باید جدي ونیول شي. پاکستان د اوربند په ګډون هېڅ ډول اصولو ته ژمن نه دی پاتې شوی.»
د سیاسي چارو شنونکی ګلاب خان باز وايي: « زموږ غوښتنه دا ده چې دا پرېکړه لیک باید دلته پاتې نه شي بلکې د امنیت شورا تر مېز ورسول شي او ټول زبرځواکونه په دې خبر شي چې دلته پاکستان وحشت او جنایت ترسره کړی.»
د دې اعتراض لیک لاسلیک کوونکي ټینګار کوي چې د دوی اعتراض باید تر ملګرو ملتونو او امنیت شورا ورسول شي او هلته یې په اړه جدي څېړنه وشي.
