د چارو ادارې او د اداري اصلاحاتو او ملکي خدمتونو ادارې په همکارۍ د پوهنې وزارت په بېلابېلو ریاستونو کې ۱۳۶ پروسې چې د مراجعینو کچه یې لوړه کړې وه، د ۱۰ میاشتو په موده کې ساده شوې دي.
د پوهنې وزارت چارواکي وایي، په هېواد کې د معیاري زده کړو د کچې لوړولو ترڅنګ هڅه کوي د هغو ریاستونو پروسې ساده کړي چې زیات مراجعین لري.
د پوهنې وزارت د کیفیت تضمین معین عبدالخالق صادق وايي: « د چارو ادارې مسوولینو، مرستیال او دغه ټیم ته اطمینان ورکوو چې موږ ژمن یو او د دې پروسې عملي کېدل به پلي کوو.»
په ورته مهال، د چارو ادارې چارواکي وایي، په وزارتونو او ادارو کې یې له ساده سازۍ موخه خلکو ته په لوړه کچه د خدماتو وړاندې کول، د فساد مخنیوی، د زياتو لګښتونو مخنیوی او د سهولتونو په رامنځته کولو سره د حکومت او خلکو ترمنځ د فاصلې له منځه وړل دي.
د چارو ادارې مرستیال سیفالدین طایب وايي: « یو هدف خلکو ته په وخت د خدمتونو رسول دي. کله چې پروسې ساده شي، خدمتونه په چټکه توګه خلکو ته رسول کېږي. دویم هدف د اداري فساد او بیوروکراسۍ له منځه وړل او کمول دي. که موږ ساده شوې پروسې په اساسي توګه پلې کړو، کاغذ پراني له منځي ځي یا کمېږي.»
بل پلو، د اداري اصلاحاتو او ملکي خدمتونو ادارې چارواکي وایي، دریاست الوزراء له لوري د ۸۹۶ حکم پر بنسټ یې په ۱۳ ګڼ مراجعینو لرونکو وزارتونو کې ۹۴۲ پروسې ساده کړې او په خبره یې روان کال په پلان کې لري چې په ۲۵ نورو وزارتونو کې هم يو لړ سختې پروسې له تشخيص وروسته ساده کړي.
د اداري اصلاحاتو او ملکي خدمتونو ادارې رییس محمد طاووس طارق وايي: « دا هغه وزارتونه وو چې په کې ۹۴۲ پروسې ساده او هېوادوالو ته وړاندې شوې. دا ریاست راتلونکی کال په خپل پلان کې لري چې په ۲۵ نورو وزارتونو او خپلواکو ادارو کې هم ځنډنۍ پروسې په ګوته او ساده کړي.»
د اداري اصلاحاتو او ملکي خدمتونو ادارې د چارواکو په خبره، تېر کال د ظرفیت لوړونې په موخه ۱۲ زره کسانو ته زده کړې ورکړل شوې دي او د دې ادارې د تعییناتو ریاست له لوري له شاوخوا ۲۰۰ زرو کسانو ازموینې اخیستل شوي دي چې ۳۱ زره هغه یې په وزارتونو او ادارو کې پر دندو ګومارل شوي دي.
