Skip to content
په کابل کې نن شنبه د «۱۴۰۰ کال د سلواغې پر ۳۰ مه» د پوهنتونونو استادان راټول شوي او د امریکا له متحده ایالتو یې وغوښتل،چې د افغانستان کنګل شوې شتمني ازاده او د افغانانو پانګه دې پر نورو نه تقسیم کوي.
دوی وايي، د سپټمبر پېښه په افغانانو پورې اړه نه لري او امریکا دې له دغې غيرې عادلانه پرېکړه لاس واخلي.
د پوهنتون استاد پوهاند نجیب الله امرخېل وايي:« ښه بېلګه يې د متحده ايالاتو د ولسمشر جو بايډن ناځوان مردانه او له کينې ډکه پرېکړه ده. امریکا غواړي،چې د افغانستان شتمني چې اوه میليارده ده،د کونډو، يتيمانو او بالاخره د افغانستان د خلکو شمتني ده، لوټ او تالان کړي. امریکا دې دا ثابته کړي،چې د سپټمبر په پېښه کې افغانان ښکېل ول يا په کې یې لاس درلود، يا افغانستان پلان کړي وي او يا دا چې له افغانستانه شوي وي.»
یو شمېر نور بیا وايي، کنګل شوې شتمني د افغانۍ ارزښت ساتلو په موخه پشتيبانه ده او کنګل کول يا ویشل يې د افغانۍ بې ثباته کېدو ته زمینه برابرول دي.
د پوهنتون استاد محمد اکبر مير وايي:« د مرکزي بانک اسعاري زېرمي د پولي واحد او اثارو د ثبات د تايداتو د بيلانس ساتلو او ثبات او نړيوالو سوداګريزو معاملو تحصيل لپاره دي، نو د افغانستان د پوهنتونونو استادان د سپټمبر پېښې قربانيانو او د افغانستان د خلکو لپاره د بشر دوستانه مرستو په نوم يو غیرې عادلانه کار او د هېواد د اقتصادي نظام د پاشلو او افغان ملت ته جزا ورکول دي.»
اخوا یو شمېر استادانو بيا د سوداګرۍ پر نړيوال سازمان غږ وکړ،چې افغانستان هم د ياد سازمان د غړي په حیث پاتې شوی او اوس په کار ده،چې د سوداګرۍ د ستونزو مخنیوي په خاطر د کنګل شوې شتمنۍ د خلاصون لپاره جدي ګامونه واخلي.
د پوهنتون استاد نصيراحمد محبت وايي:« افغانستان په ۲۰۱۵ کال کې د سوداګرۍ نړيوال سازمان غړیتوب تر لاسه کړی دی،نو د افغانستان د پوهنتونونو استادان له دغه غړیو څخه غواړي،تر څو د دوی د غړي هېواد د افغانستان په زېرمو د دغه ډول ښکاره بريد او غيرې قانوني کړنو مخه ونیسي.»
وروسته له هغه،چې د امریکا متحده ایالتو ولسمشر جو بايډن د افغانستان له کنګل شوې شتمنۍ ۳،۵ يې د سپټمبر قربانيانو ته ځانګړې کړه، ياده پرېکړه په افغانستان او نوره نړۍ کې له پراخ غبرګون سره مخ شوه او د بايډن دغه پرېکړه یې د افغانانو په حق کې ظلم او بې عدالتي یاده کړې ده.
