پاکستان چې تل يې تر خپل کنټرول لاندې سيمو کې د وضعيت خرابوالي پړه پر افغانستان اچولې، يو وار بيا یې په افغانستان کې له امريکا پاتې شوې وسلې د ځان لپاره خطر ګڼلی.
د دې هېواد پوځ ادعا کړې چې دغه وسلې تور بازار ته د خرڅلاو لپاره ور بهېږي او هلته يې دا امکان شته چې د وسله والو ډلو له لوري وپېرل شي او له همدې کبله يې وړانديز کړی چې يادې وسلې په بېړه د امريکا له لوري بېرته وپېرل شي.
د پاکستان د پوځ ویاند احمد شريف چودري ویلي: « امريکا دې له افغانستانه د خپلو ځواکونو د ايستلو پرمهال هلته پاتې شوې وسلې بېرته وپېري. دا وسلې تور بازار ته روانې دي او وسله والې ډلې پرې تقويه کېږي او هلته يې ناکنټروله خرڅلاو د پاکستان امنيت لپاره په مستقيمه توګه ګواښ دی.»
داسې ښکاري چې د پاکستان ورته متواترو ادعاوو په اړه چې بې اساسه بلل شوي، د افغانستان حکومت بې تفاوته دی او دې تازه ادعا ته يې هېڅ غبرګون نه ښيي.
خو وړاندې يې د امريکا پاتې شوې وسلې او مهمات د افغانستان ملکيت بللی و او ډاډ يې ورکړی چې دا وسلې د حکومت په ډېپوګانو کې خوندي دي.
د سیاسي چارو شنونکي هم له دې مهماتو په ځای استفاده د افغانستان حکومت حق بولي او زياتوي چې پاکستان په ورته ادعاوو او څرګندونو سره نه شي کولی د افغانستان مالکيت په سر بولۍ ته څوک راوبولي.
د سیاسي چارو کارپوه ادریس محمدي ځاځی وايي: « پاکستان بیاځل غواړي افغانستان له انزوا سره مخ کړي او دلته سیاسي، اقتصادي او اجتماعي بې ثباتي رامنځته کړي او د رسمیت پېژندنې پيل شوې لړۍ مخه ونیسي. د پاکستان مطلب دا دی چې افغانستان یوځل بیا له کورنۍ او نړیوالې جګړې سره مخ کړي.»
ځينې نور بيا د پاکستان د پوځ ادعا د ردولو ترڅنګ تجويز کوي چې دا هېواد دې په خپله خاوره او تر خپل کنټرول لاندې سيمو کې د وسلو د پلور پر قانوني او تور بازار څارنه زياته کړي او په دې توګه دې د خپل مسووليت بار د افغانستان پر اوږو نه اچوي.
د نړیوالو اړیکو کارپوه نجیب الرحمن شمال وايي: « موږ په دې پوهېږو چې له څو لسیزو راهیسې پاکستان او په ځانګړې توګه سرحدي سیمو کې د وسلو فروش او قاچاق عادي خبره ده؛ له همدې امله امکان لري هغه وسلې چې د پاکستان د مخالفو ډلو په لاس کې دي، د پاکستان د امنیتي ځواکونو هغه وسلې وي چې د امریکا له خوا دوی ته ورکړل شوې او د وسله والو له خوا غنیمت نیول شوې دي.»
د مالوماتو پر بنسټ، د پوځيانو له ايستلو وروسته په افغانستان کې د ۷ میليارد ډالرو په ارزښت د امريکا وسلې او مهمات پاتې شوي.
له دې وړاندې د پاکستان بهرنیو چارو وزارت ویاند هم په افغانستان کې د امریکا پر پاتې شویو پوځي تجهیزاتو اندېښنه ښودلې وه او ادعا یې کړې وه چې د تحریک طالبان پاکستان په ګډون بېلابېلې ډلې له دغو پوځي تجهیزاتو په پاکستان کې د بریدونو لپاره کار اخلي.
