د پاکستان ډان ورځپاڼې د دې هېواد د امنيتي چارواکو له قوله راپور ورکړی چې پوځ له دوو ورځو راهيسې د شمالي وزيرستان په ځينو سيمو کې د امنيتي اندېښنو له امله ګرځبنديز اعلان کړی.
ځايي خلکو د پاکستاني پوځ دغه کار د ځورونو هغه ډول یاد کړی چې د دوی پر ژوند، کاروبار او روغتيايي خدمتونو ته پر لاسرسي مخامخ اغېز لري.
په دې اړه د ځينو خپرو شویو راپورونو له مخې، میرانشاه، دته خېل، رزمک، ميرعلي او بنو د شمالي وزيرستان هغه سيمې دي چې د پوځ له لوري په کې ګرځبنديز اعلان شوی او له خلکو غوښتل شوي چې د اړتيا پرمهال د تګ راتګ لپاره د اصلي لارو پر ځای بديلې فرعي لارې وکاروي.
د سیاسي چارو شنونکی عزیز معارج وايي: « د دې پر ځای چې د پاکستان چارواکي او امنیتي ځواکونه امنیتي تدابیر غوره کړي، له خپل ملت او خلکو سره خبرې اترې وکړي، د هغوی ستونزو ته رسېدنه وکړي، برعکس ځوروي یې، بندیزونه پرې لګوي او فکر کوي چې همدا د جګړې د مخنیوي لاره ده او له امله یې امنیت ټینګېدای شي. دا په داسې حال کې ده چې دغه کار برعکس د پاکستان د پوځ ضعف او د بلوڅ آزادي غوښتونکو غښتلتیا ښيي.»
ځينو نورو رسنیو د سیمه يیزو سرچینو له خولې راپور ورکړی چې د شمالي وزيرستان او خيبر پښتونخوا په ځينو سيمو کې د پاکستاني پوځيانو پر مرکزونو بريدونه هم شوي چې په کې درې تنه پوځيان وژل شوي او څلور نور ژوبل شوي دي.
له بلې خوا، بلوڅ آزادي غوښتونکو د یوې خبرپاڼې په خپرولو سره ادعا کړې چې د بلوچستان کېچ ولسوالۍ په هوشاب سیمه کې یې د جګړې په پايله کې د پاکستاني پوځيانو يو مهم مرکز نيولی.
د بلوڅ آزادي غوښتونکي غورځنګ خبرپاڼې یوه برخه: « جنګياليو د تربت او هوشاب ترمنځ اصلي لویه لاره وتړله او ناڅاپي پلټنې یې پیل کړې. څو ساعتو پورې یې د دې لارې کنټرول په لاس کې و. هم مهاله د آزادۍ پوځ يوې بلې ډلګۍ د هوشاب په سیمه کې د ګواند سارن مرکز او هلته مېشت امنيتي ځواکونه او وسلې ونیول چې نيول شوي عسکر یې وروسته خوشې کړل.»
د سیاسي چارو شنونکی توریالی ځاځی وايي: « نوم د ټي.ټي.پي یا طالبانو ورباندې ږدي، خو په اصل کې د دوی هدف د پښتون ملت له منځه وړل او له پنجاب سره د کوزې پښتونخوا یوځای کول دي. پنجاب به دا آرمان له ځان سره ګور ته یوسي.»
د پاکستاني رسنیو د راپورونو له مخې، په روانه اپریل میاشت کې په خیبرپښتونخوا او بلوچستان کې پر پاکستاني پوځيانو شویو بریدونو کې شاوخوا ۸ پوځیان وژل شوي او له ۳۰ زیات ژوبل شوي دي.
د راپورونو پر بنسټ، وروستی برید یې د اپریل پر ۱۵ مه د بلوچستان په مستونک کې د سړک غاړې بمي چاودنه وه چې درې پاکستاني پوځيان په کې ووژل او ۱۸ نور ټپیان شول.
