د پاکستان له خوا مرسته شویو غنمو لومړۍ جوپه افغانستان رارسېدلې

له افغانستان  سره د بشري مرستو په دوام پاکستان د ژمنه شویو پنځه زره مټریک ټنه غنمو مرستې لومړۍ جوپه چې ۱۸۰۰ ټنه ول، د  پنجشنبې په ورځ د « ۱۴۰۰ کال د مرغومې پر ۹ مه » تورخم کې د اسلامي امارت ځايي مسوولینو ته وسپارل شوه. 

 د پاکستان  لومړي وزیر عمران خان ځانګړي استازي محمد شهباز ویلي،هېواد یې له افغانانو سره پنځه زره ټنه غنم مرسته کوي او دا د ژمنه شویو مرستو لومړۍ جوپه ده.

محمد شهباز وايي: « عمران خان له افغانانو سره د مرستې لپاره ټولټال ۵ زره ټنه غنم په پام کې نیولي او دا یې لومړۍ جوپه ده چې راورسیده.»

نوموړي وویل، یاده مرسته د لومړي وزیر عمران خان د هغو پنځه میلیارده پاکستانۍ کلدارو ژمنه شویو مرستې له برخې ده،چې له افغانستان سره یې د بشري مرستو په برخه کې ځانګړې کړې ده

محمد شهباز  زیاتوي:« د مرستو دغه لړۍ به دوام مومي او هره اوونۍ به له پېښور ښاره د افغانستان بېلابېلو ولایتونو ته د درملو او غنمو مرستې راستول کېږي. د پاکستان د درملو د تولید سکتور تر اوسه پورې  افغانستان سره د ۱۶۰ میلیونه کدارو په ارزښت د درمل او روغتیايي توکو مرسته کړې ده.»

په ورته وخت کې شهباز پر نړېواله ټولنه غږ وکړ،چې د افغانانو لاسنیوی وکړي.

هغه زیاته کړه، له افغانانو سره خپلو مرستو ته دوام ورکوي او په خبره یې  افغان زده کوونکو، ناروغانو او سوداګرو ته یې د وېزو په برخه کې هم اسانتیاوې برابرې کړي دي.

د پاکستان له لوري د غنمو دغه مرسته داسې مهال رارسېږي،چې یاد هېواد له افغانانو سره د هند له خوا مرسته شویو۵۰  زره مټریک ټنه غنمو انتقال مخه نیولې او اجازه نه ورکوي،چې په هندي موټرو کې د واګې بندر له لارې تر افغانستانه راوړل شي