وروسته له هغه،چې د پاکستان جیټ الوتکو پر افغان خاوره هوایي بریدونه وکړل او له سختو غبرګونونو سره مخ شول، د پاکستان د بهرنیو چارو وزارت له اسلامي امارت غوښتي،چې ډیورنډ فرضي کرښې ته د څېرمه سیمو امنیت خوندي او د پاکستان ضد وسله والو پر وړاندې اقدامات وکړي.
یاد وزارت له اسلامي امارته غوښتي دي،چې په خپله خاوره کې دې د هغو وسله والو ډلو مخه ونیسي،چې له دغې خاورې په استفادې په پاکستان کې په ډاډه زړه وسله والې کړنې ترسره کوي.
د پاکستان بهرنیو چارو وزارت وایي،اسلام اباد د افغانستان ځمکنۍ بشپړتیا ته درناوی لري او چمتو دي،چې له افغانستان سره په ټولو برخو کې دوه اړخېزه همکاري پیاوړې کړي.
اسلامي امارت بیا د پاکستان ادعا رد کړې او ویلي یې دي،چې دوی هېڅ ډلې ته د ګاونډیو هېوادونو پر ضد د افغان خاورې کارولو اجازه نه ورکوي.
دفاع وزارت پاکستان ته خبرداری ورکړی،که چېرته د دوی دا ډول بریدونه دوام وکړي، نو په یاد دې ولري،چې افغانان خپل پور هېچاته هم نه پرېږدي.
