د پاکستان بشري حقونو کمیسيون په تازه راپور کې چې د خیبر پښتونخوا د امنیتي او اقتصادي وضعیت په اړه يې خپور کړی، هلته پر روان وضعیت ژوره اندېښنه ښودلې.
په راپور کې ویل شوي، په ۲۰۲۵ کال کې پر پاکستاني ځواکونو د شویو بريدونو نږدې دوه پر درېیمه برخه په خیبر پښتونخوا کې شوې او د يادو بريدونو له امله د امنيتي وضعيت په خرابېدو سره، ځايي اوسېدونکي له جبري بېځایه کېدو او عدالت ته له محدود لاسرسي سره مخ شوي.
د پاکستان د بشري حقونو کمیسيون ویلي: « په خیبر پښتونخوا کې ځايي امنیتي چارواکي د نظم او قانون د تطبیق واک نه لري؛ ځکه د اساسي قانون پر بنسټ دغه واک پوځ سره دی چې له امله یې په ولس کې کرکه رامنځته شوې. هلته تر ډېره روغتیايي مرکزونه بند دي او د کمزوري اقتصاد لرونکي له عایدو بې برخې شوي او دغه راز په مکرره توګه د خلکو بې ځایه کېدل د اغېزمنو ټولنو لپاره اوږد مهاله ناوړه پایلې لري.»
له دې سره هممهماله، د پښتون ژغورنې غورځنګ مشر منظور احمد پښتين وايي، په خیبر پښتونخوا کې د پاکستان پوځي واکدارانو تل له پښتنو هغه حقونه اخیستي چې ژوند ته یې حیاتي ارزښت لري.
نوموړي د پاکستان پارلمان له خوا د دط هېواد د پوځ مشر ته د زیاتو واکونو ورکولو ته په اشارې ویلي، له دې سره به په خیبر پښتونخوا کې د پوځي رژیم ظلمونه نور هم زیات شي.
د پښتون ژغورنې غورځنګ مشر منظور احمد پښتين ویلي: « په خیبرپښتونخوا کې نه یوازې جوماتونه، مدرسې، ښوونځي، روغتونونه او مارکیټونه بمبار شوي بلکې د عامو خلکو کورونه هم بمبار شوي دي. که چا له نږدې دغه وضعیت نه وي لېدلی، نو د خپلو نږدې ملګرو یا زموږ له لارې دې معلومات ترلاسه کړي چې دا ظلمونه څنګه ترسره شوي او د خلکو له ملکیتونو څنګه د پوځي مرکزونو په توګه کار اخیستل کېږي.»
شنونکي د پاکستان پوځي رژیم تأسیس په سیمه کې د لویدیځوالو د اهدافو تعقیب لپاره پروژه ګڼي. د دوی په خبره، اسلاماباد تل د زبرځواکونو هېوادونو د اهدافو د تحقق لپاره سیمه ناامنه کړې ده.
د سیاسي چارو شنونکی توریالی ځاځی وايي: « پاکستان د انګرېزانو له خوا جوړ شوی او ډېر جنایت کارانه سیاست لري. نړیواله ټولنه باید د دوی پر وړاندې ګامونه پورته کړي.»
د پاکستان بشري حقونو کمیسيون له خوا په خیبر پښتونخوا کې د ترینګلي امنیتي وضعیت راپور داسې مهال خپرېږي چې تازه د دې هېواد په پلازمېنه اسلاماباد کې د یوې محکمې مخې ته موټر بم چاودنې ۱۲ کسان وژلي او ګڼ نور یې ټپیان کړي دي.
دغه راز تحریک طالبان پاکستان یا ټي ټي پي ته منسوبو ادرسونو ادعا کړې چې دېره اسماعیل خان کې یې د يوه بريد په نتيجه کې ۱۰ پاکستاني پوځيان وژلي دي.
