د افغانستان لپاره د ازبېکستان ځانګړي استازي په تاشکند کې د پاکستان له سفیر سره کتلي او د افغانستان د اوسني وضعیت او د دواړو هېوادونو د اړوندو همکاریو په اړه یې خبرې کړې.
د ازبېکستان بهرنیو چارو وزارت په یوه خبرپاڼه کې ویلي، دواړه لورو د سیمې د امنیتي مسایلو او په ځانګړي ډول د افغانستان وضعیت په اړه بحثونه کړي.
د خبرپاڼې یوه برخه کې راغلي: « د افغانستان لپاره د ازبېکستان د ولسمشر ځانګړي استازي عصمت الله ایرګاشیف په ازبېکستان کې د پاکستان له سفیر احمد فاروق سره په افغانستان کې د امنیت په برخه کې په پرمختګونو، سیمه ییزو امنیتي مسایلو، افغان ټرانس رېل پټلۍ چې یوه اقتصادي لار بلل کېږي، خبرې کړې دي.»
د اسلامي امارت چارواکي سرپرست حکومت د ازبېکستان په شمول د سيمې او نړۍ له ټولو هېوادونو سره د سياسي، اقتصادي او سوداګريزو اړيکو پراختيا او پیاوړتيا ته ژمن بولي.
د اسلامي امارت مرستیال ویاند حمدالله فطرت وايي: « ازبېکستان د افغانستان یو مهم ګاونډی هېواد دی او د دواړو هېوادونو ترمنځ په بېلابېلو برخو کې ګڼ مشترکات موجود دي. دا مهال د دواړو هېوادونو ترمنځ په سیاسي، اقتصادي، تجارتي، ټرانزیټي او نورو بېلابېلو برخو کې اړیکې په ډېر ښه پړاو کې دي او لا پیاوړې کېږي. افغانستان غواړي له ټولو هېوادونو او په ځانګړې توګه ګاونډیو هېوادونو سره ښې او مثبتې اړیکې ولري. موږ خپلو ګاونډیانو ته ډاډ ورکوو چې د افغانستان له خاورې به چاته تهدید متوجه نه شي.»
د سیاسي چارو کارپوهان ټینګار کوي چې له سياسي او اقتصادي انزوا د وتلو لپاره بايد اسلامي امارت د ازبېکستان په ګډون د نړۍ له ټولو هېوادونو سره ښو اړیکو او مثبت تعامل ته لاره هواره کړي.
د سیاسي چارو کارپوه ادریس محمدي ځاځی وايي: « د اسلامي امارت د بهرنیو چارو پالیسي د ستایلو وړ ده. د ازبېکستان په ګډون باید ټولې نړۍ سره په اوسنیو شرایطو کې سیاستونه داسې تنظیم شي چې د دواړو خواوو خیر او ښېګڼه په کې خوندي وي.»
د سیاسي چارو کارپوه مرتضی مطهري وايي: « هرڅومره چې د ازبېکستان هېواد او اسلامي امارت ترمنځ اړیکې تودې شي، د افغانستان خلک ترې هرکلی او ملاتړ کوي. موږ له ازبېکستان سره د لا پیاوړو اقتصادي اړیکو غوښتنه کوو.»
دا په داسې حال کې ده چې له تېرو څه باندې درېیوکالو راهیسې ازبېکستان، چین او متحده عربي اماراتو په رسمي ډول د اسلامي امارت سفیران منلي خو د سرپرست حکومت د رسمیت پېژندلو لپاره یې ګامونه نه دي پورته کړي.
