له تېرو ۱۶ ورځو راهسې د پاکستاني پولیسو له لوري د مسافرو، سوداګریزو توکو او ترانزيټ پرمخ د تورخم لارې تړل د دواړو هېوادونو ترمنځ پر ګرمه موضوع بدله شوې.
د پاکستان بهرنیو چارو وزارت ویاند شفقت علي خان په دې خبري کنفرانس کې د تورخم لارې د بندېدو او د ډیورند فرضي کرښې په اوږدو کې، د وروستیو نښتو په تړاو د یوې پوښتننې په ځواب کې د ملامتیا ګوته افغان لوري ته ونیوه او ادعا یې کړې چې افغان ځواکونو په خپلسري ډول تاسیسات جوړول او پارونکي اقدامات یې ترسره کول چې پاکستان لوري ورته غبرګون وښود او جګړه رامنځته شوه.
د شفقت علي خان په خبره، ستونزه لا تراوسه حل نه ده او اسلام اباد له کابل غواړي چې د نړیوالو اصولو او د ملګرو متلونو منشور ته درناوی وکړي او شخړې د خبرو له لارې حل کړي.
هغه په دې اړه ویلي:« په دې وروستیو کې موږ ځینې راپورونه اورو چې ګواکې دغه لار د پاکستان د یو اړخیزو اقداماتو له کبله تړل شوې؛ خو واقعیت دا دی چې افغان لوري د کرښې په اوږدو کې پارونکي اقدامات ترسره کول او تورخم ته نږدې یې خپلسري تاسیسات جوړول. موږ د خبرو له لارې د دې مسالې د هوارولو هڅه وکړه خو هغوی د تورخم پر ترمینل او زموږ پر پوستو بریدونه وکړل.»
په ورته وخت کې د کډوالو او بېرته راستنېدونکو چارو وزارت سرپرست وړمه د پاکستان له سفیر سره په کتنه کې له اسلام اباده وغوښتل چې له تخريبي فعالیتونو ډډه وکړي.
د سیاسي چارو کارپوهان د پاکستان د حکومت له خوا د تورخم دروازې تړل غندي او دا عمل د ډیورنډ فرضي کرښې په اوږدو کې د دې هېواد له لورې د اسختباراتي پلانونو پیل ګڼي.
د سیاسي چارو کارپوه توریالی ځاځی وايي: دا حق پاکستان ولې ځان ته ورکوي چې زموږ په خپله خاوره هرڅه کوو، دا خو د دوی کار نه دی. تر نن ورځې پورې دوی چې په دې خپله خاوره کې پوستې جوړې کړې دي، د طالبانو حکومت د دوی پر وړاندې څه ویلي دي. دا یوه سیاسي او استخباراتي لوبه ده چې په ډیورنډ کرغیړنې کرښه کې جوړه شوې او دا د انګریزانو او امریکایانو په وسیله باندې یې ملاتړ کېږي.»
هڅه مو وکړه چې د پاکستاني لوري دې ادعا په تړاو د اسلامي امارت نظر هم له ځان سره ولرو، خو له پرلپسې اړيکو سره سره يې بیا هم نظر شريک نه کړ.
د یادونې وړ ده چې د دواړو هېوادونو تر منځ د خپلمنځي نښتو په پایله کې له ۱۰ ډېرو کسانو ته مرګ ژوبله اوښتې او شاوخوا ۸۰۰ کورنۍ د خپلو کورونو پرېښودو ته اړې شوې دي.
